एजेन्सी । शारजाहबाट कराँचीका लागि उडेको पाकिस्तानको ‘के२ एयरवेज’ को एक कार्गो विमान (बोइङ ७३७) अचानक बेपत्ता भएको छ । बीबीसी उर्दू सेवाका अनुसार उक्त विमानमा चालक दलका पाँच जना सदस्य सवार थिए।
पाकिस्तान एयरपोर्ट अथोरिटीलाई उद्धृत गर्दै बीबीसी उर्दूले जनाएअनुसार, मंगलबार पाकिस्तानी समयअनुसार राति ९:१८ बजे विमानको नेभिगेसन प्रणालीमा खराबी आएको सूचना प्राप्त भएको थियो ।
त्यसलगत्तै कराँची एरिया कन्ट्रोल सेन्टरले तत्कालै विमानलाई मार्गनिर्देशन (गाइड) गर्न शुरू गरेको थियो। तर, राति ९:२१ बजे रडारमा विमान तीव्र गतिमा तलतिर झरिरहेको देखियो र त्यसको दिशा पनि अचानक बदलियो । त्यसको केही बेरमै कराँचीभन्दा करिब १५५ नटिकल माइल पश्चिममा विमानको रडार र रेडियो सम्पर्क पूर्ण रूपमा विच्छेद हुन पुगेको हो ।
बेपत्ता विमानको खोजीका लागि पाकिस्तानी नौसेना (नेभी), वायुसेना (एयरफोर्स) र अन्य सरकारी एजेन्सीहरू परिचालन गरिएका छन्। पाकिस्तानी नौसेनाको युद्धपोत ‘पीएनएस जुल्फिकार’लाई सम्भावित दुर्घटना क्षेत्रमा पठाइएको छ । यसै गरी, पाकिस्तानी नौसेनाको एक एटीआर विमानले तुर्बतबाट उडान भरेर खोजी शुरू गरिसकेको छ भने पाकिस्तान नेशनल शिपिंग कर्पोरेसनको व्यावसायिक जहाज ‘लाहोर’ पनि खोज तथा उद्धार अभियानमा जुटेको छ।
पाकिस्तानमा यसअघि सन् २०२० मा ठुलो विमान दुर्घटना भएको थियो। त्यस समयमा पाकिस्तान इन्टरनेशनल एयरलाइन्सको एक आन्तरिक यात्रुवाहक विमान कराँची विमानस्थलमा अवतरण गर्नु ठीक अघि दुर्घटनाग्रस्त भएको थियो। उक्त विमानमा सवार ९९ जनामध्ये केवल दुई जना मात्र जीवित बच्न सफल भएका थिए।
