दमक । नेपाली कांग्रेसका उपसभापति विश्वप्रकाश शर्माले निर्वाचनलाई उत्तेजना, आवेग र घृणाको मैदान नबनाउन आग्रह गर्नु भएको छ ।
उहाँले लोकतान्त्रिक अभ्यासमा मत व्यक्त गर्ने क्रममा मतदाताले झोक वा रिसका आधारमा निर्णय लिनु उचित नहुने जनाउदै यस्तो बताउनुभएको हो ।
झापाको धुलावारीमा सोमबार पत्रकारसँग कुरा गर्दै शर्माले निर्वाचनलाई स्वस्थ प्रतिस्पर्धा र विचारको संघर्षका रूपमा लिनुपर्नेमा जोड दिनु भएको छ । शर्माले देशले खोजेको परिवर्तन कुनै एक व्यक्तिमा सीमित नभएको जिकिर गर्नु भयो । यहाँ अमुक एक ब्याक्तिलाई प्रधानमन्त्री बनाउनसाथ परिवर्तन सम्भव नभएको उहाँको दाबी थियो ।
प्रशासनिक सुधार, राजनीतिक संस्कार, निजी क्षेत्रको पारदर्शिता र विकास निर्माणको गतिमा सुधार आवश्यक रहेको शर्माको भनाई छ । यी सबै क्षेत्रमा व्यापक परिवर्तन र रूपान्तरण आवश्यक रहेको शर्माले बताउनु भयो । परिवर्तन समग्र क्षेत्रमा चाहिएको हो, उहाँले भन्नुभयो ।
शर्माले पछिल्लो समय युवापुस्तामाझ उठेको “जेनजी” आन्दोलनको माग पनि यही समग्र परिवर्तनसँग जोडिएको उल्लेख गर्नु भयो । युवाहरूले पारदर्शिता, रोजगारी, उत्तरदायी शासन र दिगो विकासको माग गरिरहेको भन्दै उनले ती मागलाई राजनीतिक दलहरूले गम्भीरतापूर्वक लिनुपर्ने बताउनु भयो ।
जनताले सुशासन, तीव्र विकास र जिम्मेवार नेतृत्व खोजेका छन्, शर्माले स्पष्ट पार्नु भयो । यो गगन थापा नेतृत्वको काँग्रेसले गर्छ, शर्माले जनाउनु भयो । सबैलाई समेटेर लैजान सक्ने र सबैसंग मिल्न सक्ने क्षमता नेपाली काँग्रेस बाहेक अरुसँग नरहेको शर्माले बताउनुभयो । लोकतन्त्रको सौन्दर्य नै शान्तिपूर्ण बहस, नीति र दृष्टिकोणको प्रतिस्पर्धा भएको उल्लेख गर्दै उहाँले चुनावी अभियानमा संयमता आवश्यक रहेको शर्मा जनाउनुभयो ।
आफूलाई निर्वाचनपछिको प्रधानमन्त्रीको रुपमा उभ्याउनु भएका नेकपा एमालेका अध्यक्ष एवं पूर्व प्रधानममन्त्री केपी शर्मा ओली र रास्वपाका बरिष्ठ नेता बालेन्द्र शाहसँग आफ्ना पार्टी सभापति तथा आफूहरुले निर्वाचनपछिको प्रधानमन्त्रीको रुपमा अघि सारेका गगन थापासंग बहसका लागि आग्रह गर्नु भयो । मतदातालाई संयम, विवेक र दीर्घकालीन सोचसहित मतदान गर्न उनले पुनः आग्रह गर्नुभयो ।
