काठमाडौं । चुनावै पिच्छे निर्वाचन क्षेत्र फेरिरहने नेकपाका संयोजक पुष्पकमल दाहाल प्रचण्डले यसपटक रुकुमपूर्वमा उम्मेदवारी दिने घोषणा गरेका छन्।
प्रचण्डले कहाँ चुनाव लड्लान भन्ने चर्चा र अनुमान शनिबारदेखि अन्त्य भएको छ। शनिबार रुकुम पश्चिममा पुगेर आफूले रुकुम पूर्वबाट चुनाव लड्ने घोषणा गरेपछि दाहाल रोल्पा, सिन्धुली, नुवाकोट, सिन्धुपाल्चोक जस्ता पूर्वमाओवादी बलियो भएको ठाउँमा जाने अड्कलबाजी अन्त्य भएको छ।
त्योसँग दाहालले आँखा लगाएको अर्को क्षेत्र लुम्बिनी प्रदेशको रोल्पामा नेकपाका नेता वर्षमान पुनले तेस्रोपटक रोल्पाबाट चुनाव लड्ने भएका छन्।
उम्मेदवारी सिफारिस गर्दा रोल्पाबाट संयोजक दाहालको नाम पहिलो र पुनको दोस्रो नम्बरमा सिफारिस भएको थियो। पुनले यसअघि २०७४ र २०७९ को चुनावमा रोल्पाबाट निर्वाचित भएका थिए। २०६४ सालको पहिलो संविधानसभामा ललितपुर १ बाट निर्वाचित भएका पुन २०७० मा मोरङ ६ बाट पराजित भएका थिए।
नेकपाबाट पुनलाई रोल्पामा ढोका खुल्दा नेकपा (माओवादी)का महासचिव नेत्रविक्रम चन्दले पनि रोल्पामा चुनाव लड्ने आकांक्षा देखाएका छन्।
चन्दको नाम एकल रुपमा सिफारिस भएको छ। रोल्पाबाट चुनाव उठ्ने विषयमा चन्दले संयोजक दाहालसँग पनि एक चरण छलफल गरेको नेकपा स्रातले बतायो। प्रकाण्डलाई लिएर दाहाललाई भेट्न पुगेका चन्दले आफ्नो नाम पनि रोल्पाबाट सिफारिस भएको जनाउँदै चुनावी प्रतिस्पर्धा गर्न सक्ने संकेत गरेका थिए।
जवाफमा दाहालले चन्दलाई कापिलवस्तु ३ मा उम्मेदवारी दिए आफ्नो पार्टीले पनि सहयोग गर्न सक्ने आश्वासन दिएको स्रोतको दाबी छ।
चन्दको पार्टीको केन्द्रीय कार्यालय पनि कापिलवस्तुमै भएकाले दाहालले रोल्पाको क्षेत्र सहज रुपमा आफ्नो पार्टीको पोल्टामा पार्न खोजेका छन्।
