काठमाडौं । मकवानपुर, भीमफेदी गाउँपालिका-६ जुरीखेतस्थित सडकमा काठमाडौंबाट हेटौंडातर्फ आउँदै गरेको ना.१ ज १७७८ नम्बरको सुमो गाडी सडकबाट करिब १ सय मिटर तल खसेर आइतबार साँझ दुर्घटना हुँदा गाडीमा सवार ६ जनाको मृत्यु भएको छ । मृत्यु हुनेहरूमा हेटौंडा उपमहानगरपलिका-४ कमलडाँडा बस्ने ४० वर्षीया सबिता लम्साल, सोही उपमहानगरपालिका-२ कान्तिराजपथ बस्ने २९ वर्षीय निखिल अग्रवाल, भारत बिहार राज्य बेगुसराई बस्ने ५० वर्षीय अरबिन्द कुमार, भारत बिहार राज्य पटना बस्ने ४२ वर्षीय रजनिस कुमार र हाल नाम, थर र वतन नखुलेका २ जना पुरूषहरू रहेका छन् । दुर्घटनामा गम्भीर घाइते भएका उनीहरूको हेटौंडा अस्पतालमा उपचारको क्रममा मृत्यु भएको हो । साथै दुर्घटनामा घाइते भएका चालक र गाडीमा सवार अन्य २ जनालाई थप उपचारको लागि चितवनतर्फ पठाइएको छ ।
रूपन्देही, सिद्धार्थनगर नगरपालिका-१ बेलहियास्थित सडकमा भैरहवाबाट बेलहिया सुनौलीतर्फ आउँदै गरेको लु.६५ प ५४१ नम्बरको मोटरसाइकल आइतबार राति दुर्घटना हुँदा चालक भारत उत्तर प्रदेश महाराजगंज कुनसेरवा नौतनवा बस्ने ३५ वर्षीय राजन चौरसियाको मृत्यु भएको छ । दुर्घटनामा गम्भीर घाइते भएका उनको भिम अस्पताल भैरहवामा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकलमा सवार अन्य १ जनालाई थप उपचारको लागि भैरहवा रिफर गरिएको छ ।
यसैगरी रूपन्देही, सिद्धार्थनगर नगरपालिका-८ बर्मेलि चोकस्थित सडकमा सुनौलीबाट बुद्धचोकतर्फ आउँदै गरेको लु.७ प ८५७६ नम्बरको मोटरसाइकललाई हाल नम्बर नखुलेको सवारी साधनले आइतबार दिउँसो ठक्कर दिँदा मोटरसाइकलमा सवार तिलोत्तमा नगरपालिका-९ मंगलापुर बस्ने ६० वर्षीय लाल बिहारी बानियाको मृत्यु भएको छ । दुर्घटनामा गम्भीर घाइते भएका उनको भिम अस्पतालमा उपचारको क्रममा मृत्यु भएको हो । प्रहरीले हाल फरार सवारी साधन र चालकको खोजी गरिरहेको छ ।
उदयपुर, त्रियुगा नगरपालिका-७ होक्सेस्थित सडकमा होक्सेबाट चुहाडे तर्फ आउँदै गरेको स.१ त २८२५ नम्बरको ट्याक्टर अनियन्त्रित भई आइतबार राति दुर्घटना हुँदा ट्याक्टरमा सवार उदयपुर त्रियुगा नगरपालिका-६ जलजले बस्ने ४३ वर्षीय राजा हुसेन अली र त्रियुगा नगरपालिका-६ मोहनपुर बस्ने बर्ष २६ वर्षीया आशा सदाको मृत्यु भएको छ । दुर्घटनामा गम्भीर घाइते भएका उनीहरूको जिल्ला अस्पताल उदयपुरमा उपचारको क्रममा मृत्यु भएको हो । साथै दुर्घटनामा घाइते भएका ट्याक्टरमा सवार १ जनालाई थप उपचारको लागि न्यूरो अस्पताल विराटनगर रिफर गरिएको छ । हाल फरार ट्याक्टर चालकको प्रहरीले खोजी गरिरहेको छ ।
दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।
