काठमाडौं । त्रिभुवन विश्वविद्यालय परीक्षा नियन्त्रण कार्यालयले परीक्षासँग सम्बन्धित सम्पूर्ण सेवाहरू अनलाइनमार्फत लिन विद्यार्थीहरूलाई आग्रह गरेको छ ।
बिहीबार एक सूचना जारी गर्दै पनिकाले विद्यार्थीहरूको सहजताका लागि स्टुडेन्ट पोर्टल प्रयोग गरी अनलाइन सेवा लिन अनुरोध गरेको हो ।
अनलाइन फारम भर्दा जुनसुकै स्थानबाट पनि फारम भर्ने सुविधा मिल्नुका साथै लामो समय सम्म लाइन बस्नु पर्ने बाध्यताबाट छुटकारा मिल्ने पनिकाले जनाएको छ । विद्यार्थी आफैँले विवरण भर्दा गल्ती हुने सम्भावना कम हुने र तथ्याङ्कहरू थप सुरक्षित रहने विश्वास लिइएको छ ।
अनलाइन रजिस्ट्रेसनका लागि आवेदन दिन विद्यार्थीको सम्बन्धित कलेजबाट परिचयपत्र बनेको हुनुपर्ने छ । यस्तै, ट्रान्सक्रिप्ट र प्रोभिजनल सर्टिफिकेटका लागि आवेदन दिँदा सम्पूर्ण मार्कशिट र रजिस्ट्रेसन कार्डलाई पीडीएफ फर्म्याटमा तयार पारी अपलोड गर्नुपर्नेछ ।
रिटोटलिङका लागि परीक्षाको नतिजा सार्वजनिक भएको १५ दिनभित्र फारम भरिसक्नुपर्ने व्यवस्था गरिएको छ । यस्तै, सन् २०२३ देखि यता रजिस्ट्रेसन भएका विद्यार्थीहरूले परीक्षा फारम पनि अनलाइन माध्यमबाटै भर्न सक्नेछन् । यी सेवाहरू प्राप्त गर्न विद्यार्थीले स्टुडेन्ट पोर्टलमा साइन इन गरी ‘Other services’ विकल्प रोज्नुपर्नेछ ।
दीक्षान्त प्रमाणपत्रका लागि भने स्टुडेन्ट पोर्टलकै ‘Convocation services’ सेक्सनमा गएर अनलाइन फारम भर्न सकिने पनिकाले जनाएको छ ।
