काठमाडौं । राष्ट्रिय स्वतन्त्र पार्टी (रास्वपा)सँग ‘बृहत् एकता’को सहमति गरेका काठमाडौं महानगरपालिकाका मेयर बालेन्द्र शाह (बालेन)को वरीयता सोमबार (पुस १४) टुंगो लगाइने भएको छ । बालेन र रास्वपाका सभापति रवि लामिछानेले आइतबार (पुस १३) सातबुँदे सहमतिपत्रमा हस्ताक्षर गरेका थिए ।
रास्वपा सभापति रवि नै र आसन्न प्रतिनिधिसभाको निर्वाचनपछि संसदीय दलको नेता तथा भावी प्रधानमन्त्रीको उमेदवार बालेन हुने सहमतिपत्रमा उल्लेख छ । तर, सहमतिपत्रमा पार्टीमा बालेनको वरीयता के हुने भन्ने प्रस्ट्याइएको छैन ।
“हामीले सातबुँदे सहमति गर्दा नै आज बिहान भइसकेको थियो । त्यसकारण आजै केही हुन सकेन,” रास्वपाका प्रवक्ता मनिष झाले भने, “भोलि पार्टीको बैठकमा वरीयतालगायत विषयमा छलफल हुन्छ अनि टुंगो समेत लाग्नेछ ।”
अन्य दलले जस्तै वैकल्पिक शक्तिका रूपमा उदाएको रास्वपाले पनि मध्यराति सहमति गरेको र सुरुआती चरणमा नै पदको भागबन्डा भएको भन्दै केहीले आलोचना समेत गरेका छन् ।
