काठमाडौं । नेकपा एमालेको एघारौँ महाधिवेशनबाट निर्वाचित पदाधिकारीहरूको शपथ ग्रहण कार्यक्रममा अध्यक्षमा पराजित ईश्वर पोखरेललाई निम्तै नगरेको खुलेको छ।
अध्यक्षमा तेस्रो पटक विजयी केपी शर्मा ओली, निर्वाचन आयोग र अध्यक्ष मण्डललेसमेत पोखरेललाई शथप ग्रहणमा नबोलाएको हो ।
थापा गाउँस्थित कार्यालयमा जम्मा भएर भृकु्टीमण्डपमा भएको शपथ ग्रहणमा जान तयारी गरे पनि पोखरेल पक्षलाई बेवास्ता गरिएको हो ।
‘शपथ ग्रहणमा गएर विजयी भएका साथीहरूलाई बधाई दिन चाहेका थियौँ । तर अध्यक्ष मण्डल, निर्वाचन आयोग र अध्यक्षबाट पनि कुनै खबर आएन’, पदाधिकारीमा पराजित एक नेताले भने, ‘ईश्वर र सुरेन्द्र पाण्डे कमरेडसहित विजयीहरूलाई भृकुटीमण्डपमा बधाई दिन चाहे पनि शपथ ग्रहणबारे कुनै जानकारी नआएपछि जाने अवस्था भएन ।’
नयाँ पदाधिकारीको शपथ ग्रहण नभएसम्म अध्यक्षमण्डल विघटन भएको थिए । अध्यक्षमण्डलले अध्यक्षका प्रत्यासी पोखरेललाई पनि नबोलाएपछि ओलीले प्रतिस्पर्धी र चुनौती दिनेलाई ठेगान लगाउने नीति नै अपनाउन खोजेको इतर पक्षको मत रहेको छ।
‘सबै जान भनेर बसेका थियौँ । तर खबर आएन’, ती नेताले भने, ‘हामीले त प्यानलमा केपी ओली र शंकर पोखरेलको पनि नाम हालेका थियौँ । त्यो जबज निर्देशित हाम्रो प्रयास थियो । तर निर्वाचन परिणामसँगै निषेधको अभ्यास शपथ ग्रहणमै देखिएको छ । निर्वाचन आयोगले सबै केन्द्रीय सदस्यहरूलाई विजयी भनिनसक्दै यस्तो अभ्यास सुरू भएको छ।’
