काठमाडौं । अखिल नेपाल फुटबल संघ (एन्फा) र राष्ट्रिय लिगका लागि दर्ता भएका १७ क्लबहरूबीच बिहिबार दशरथ रङ्गशालामा यही २०८२ पुस २५ गतेबाट सिङ्गल राउन्ड रोबिनका आधारमा सुरु हुने राष्ट्रिय लिगसम्बन्धी छलफल सम्पन्न भयो।
एन्फा महासचिव किरण राईको अध्यक्षतामा प्रमुख कार्यकारी अधिकृत इन्द्रमान तुलाधर सम्मिलित छलफलमा प्रतियोगितामा सहभागी प्रत्येक क्लबलाई तयारी खर्चस्वरूप रु १५ लाख प्रदान गर्ने निर्णय गरिएको छ। साथै, हेटौडामा सम्पन्न भएको एन्फा प्रेसिडेन्ट लिगबाट राष्ट्रिय लिगमा छनोट भएका काठमाडौँ उपत्यकाबाहिरका क्लबहरूलाई यातायात खर्च स्वरूप रु २ लाख र काठमाडौँ उपत्यका क्लबलाई रु १ लाख प्रदान गरिनेछ।
राष्ट्रिय लिगको विजेताले नगद रु ५० लाख, उपविजेताले नगद रु २५ लाख तथा तृतीय स्थान हासिल गर्ने क्लबले नगद रु १५ लाख पुरस्कार प्राप्त गर्नेछन्। क्लबहरूले खेलाडी दर्ता यही २०८२ पुस १८ गतेभित्र सम्पन्न गर्नुपर्ने र प्रतियोगिताको खेल तालिका पुस २० गते सार्वजनिक गर्ने सहमति पनि बैठकमा भएको छ ।
