काठमाडौं । नेपाल प्रिमियर लिग (एनपीएल) सिजन–२ मा सुदूरपश्चिम रोयल्स फाइनलमा पुगेको छ । पहिलो क्वालिफायरमा विराटनगर किङ्सलाई हराउँदै सुदूपश्चिम फाइनलमा पुगेको हो ।
टस हारेर पहिले ब्याटिङ गर्दै सुदूरपश्चिमले दिएको १५६ रनको लक्ष्य पछ्याउने क्रममा विराटनगर किङ्स १४ दशमलव १ ओभरमा अलआउट हुँदै मात्र ७८ रनमै समेटियो ।
तर विराटनगरलाई भने अर्को मौका छ । दोस्रो क्वालिफायरबाट विजेता हुने टिमसँग जित निकालेमा विराटनगर फाइनलमा पुग्नेछ । तर हारेको खण्डमा भने प्रतियोगितामा तेस्रो स्थानमा रहनेछ ।
विराटनरका लागि फापडुप्लेसिसले ३६, मार्सेन्ट डिलाङ्गेले १५ र बसिर अहमदले १२ रन बनाउनुबाहेक अन्य कुनै ब्याटरले दोहोरो अंकमा रन बनाउन सकेनन् ।
पहिलो बलमै श्याम हेजलेटलाई गुमाएर दबाबमा आएको विराटनगरले त्यसपछि मार्टिन गप्टिललाई पनि गुमायो । सिजनभर चलेका लोकेश बम पनि दबाबका कारण आजको खेलमा चल्न सकेनन् ।
विराटनगरलाई हराउन सुदूरपश्चिमका स्कट कुग्लेजिन, हरमित सिंह र अविनाश बोहोराले २/२ विकेट लिए भने हेमन्त धामी र दीपेन्द्र सिंह ऐरीले १/१ विकेट निकाले ।
त्यसअघि टस हारेर पहिले ब्याटिङको निम्तो पाएको सुदूरपश्चिमले ओपनर तथा विकेटकिपर विनोद भण्डारीको अर्धशतकीय इनिङ्समा निर्धारित २० ओभरमा सात विकेट गुमाउँदै १५५ रन बनाएको थियो ।
विनोदले ५२ बलमा ६३ रनको योगदान दिए । यस्तै श्लेडन ज्याक्सन र आरिफ शेखले २०/२० रन बनाउँदा हरमित सिंहले १४, इशान पाण्डेले १३ र मख्तार अमिदले १० रन बनाए । कप्तान दीपेन्द्र सिंह ऐरी भने ३ रनमै रनआउट भए ।
विराटनगरका लागि मार्सेन्ट डिलाङ्गे र प्रतीश जिसीले २/२ विकेट लिँदा सूर्य तामाङ र श्याम हेजलेटले १/१ विकेट लिए ।
अब विराटनगरले इलिमिनेटरको विजेता हुने टोलीसँग दोस्रो क्वालिफायर खेल्नेछ । इलिमिनेटरमा काठमाण्डु गोर्खाज र लुम्बिनी लायन्स खेल्नेछन् ।
