काठमाडौं । सूचना प्रविधि विभागले सञ्चालनमा ल्याएका सरकारी सूचना प्रविधि प्रणालीहरूमा देखिने प्राविधिक समस्या तत्काल समाधान गर्न मोबाइल नम्बरहरू सार्वजनिक गरेको छ । अब सरकारी कार्यालयहरूले प्रणालीमा समस्या आउँनासाथ तोकिएका डेडिकेटेड नम्बरमा सिधै सम्पर्क गर्न सक्नेछन् ।
विभागले कार्यालय समयभित्र सम्पर्क गरी समस्या टिपाउन एकीकृत कार्यालय व्यवस्थापन प्रणाली (GIOMS), एकीकृत वेबसाइट व्यवस्थापन प्रणाली (GIWMS) र केन्द्रिकृत ईमेल प्रणाली (Centralized Mail) का लागि छुट्टाछुट्टै नम्बर उपलब्ध गराएको हो । विभागका अनुसार, सरकारी कामकाजमा प्रयोग हुने एकीकृत कार्यालय व्यवस्थापन प्रणालीमा समस्या देखिए ९८६१४२६१८० मा सम्पर्क गर्न सकिनेछ ।
त्यस्तै, एकीकृत वेबसाइट व्यवस्थापन प्रणालीमा समस्या आए ९८६१४२६१७९ र केन्द्रिकृत ईमेल प्रणालीमा समस्या आए ९८६१४२६१८१ मा सम्पर्क गर्न विभागले अनुरोध गरेको छ । सरकारी कामकाजलाई कागजरहित, पारदर्शी र मितव्ययी बनाउने उद्देश्यले विभागले एकीकृत कार्यालय व्यवस्थापन प्रणाली कार्यान्वयनमा ल्याएको छ ।
यो प्रणालीमार्फत सरकारी निकायले विद्युतीय हस्ताक्षर प्रयोग गरी टिप्पणी सदर, चिठीपत्र दर्ता–चलानी, बिदा तथा काज स्वीकृत र अभिलेख व्यवस्थापन जस्ता कार्य गर्दै आएका छन् । त्यसैगरी, सरकारी कार्यालयको वेबसाइट निर्माण तथा व्यवस्थापन सम्बन्धी निर्देशिका, २०७८ अनुसार सरकारी वेबसाइटहरूमा एकरूपता कायम गर्न विभागले वेबसाइट व्यवस्थापन प्रणाली विकास गरेको हो । यस प्रणालीमा अपाङ्गतामैत्री फिचर, गुनासो व्यवस्थापन र स्वचालित सहायक (च्याटबट) जस्ता विशेषता समावेश छन् ।
यसको प्रयोगले छुट्टै प्राविधिक जनशक्ति नभएका कार्यालयहरूले पनि एउटै टेम्प्लेटमा सहजै वेबसाइट सञ्चालन गर्न सकेका छन् । विभागले यी मुख्य प्रणालीहरू बाहेक केन्द्रिकृत ई-हाजिरी, नागरिक एप, एसएमएस गेटवे र स्थानीय तहको मोबाइल एप लगायतका सेवाहरू पनि सञ्चालन गर्दै आएको छ ।
