काठमाडौं । काठमाडौं महानगरपालिका-२६ केशरमहल चोकस्थित सडकमा बा.प्र.०१-०३० च २३४८ नम्बरको कारको ठक्करबाट पैदलयात्री भारतीय नागरिक ३४ वर्षीय शेक साकिरको मंगलबार दिउँसो मृत्यु भएको छ । ठक्करबाट गम्भीर घाइते भएका उनको राष्ट्रिय ट्रमा सेन्टरमा उपचारको क्रममा मृत्यु भएको हो । कार चालकलाई प्रहरीले नियन्त्रणमा लिएको छ ।
मकवानपुर, हेटौंडा उपमहानगरपालिका-१९ बस्तीपुरस्थित सडकमा बिग्रिएर रोकी राखेको ना.५ ख ३५८७ नम्बरको कन्टेनरमा बा.४९ प ६६५८ नम्बरको मोटरसाइकल ठक्कर खाई गए राति दुर्घटना हुँदा मोटरसाइकल चालक मकवानपुरगढी गाउँपालिका-२ गैरीभञ्ज्याङ बस्ने ३० वर्षीय बाल कृष्ण अधिकारीको मृत्यु भएको छ । दुर्घटनामा गम्भीर घाइते भएका उनको हेटौंडा अस्पतालमा उपचारको क्रममा मृत्यु भएको हो । साथै ठक्करबाट घाइते भएका मोटरसाइकलमा सवार १ जनाको सोही अस्पतालमा उपचार भइरहेको छ । कन्टेनर चालकलाई प्रहरीले नियन्त्रणमा लिएको छ ।
दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।
