काठमाडाैं । सरकार जनताका लागि रक्षक हो, भनिन्छ । तर, यसको ठीक उल्टो नेपाल सरकार भने रक्षक नभएर भक्षक बनेको उदाहरण मकवानपुरको हेटौडामा देखिएको छ ।
मकवानपुरको हेटौडा बजार क्षेत्रमा सडक विस्तारको नाममा उचित मुआब्जा वितरण नै नगरी धमाधम घरमा डोजर लगाउने काम सरकारले गरिरहेको छ । ‘लामो समयदेखि बसोबास गर्दै आएका बासिन्दालाई मुआब्जा पनि नदिएर घरमा डोजर चलाउने वा दीर्घकालीन व्यवस्थापनको योजना पनि नबनाई सुकुम्बासीका टहरा भत्काउनेजस्ता काम गर्नु अति गैरजिम्मेवार हो ।’– राष्ट्र बचाउ, महाअभियानका अध्यक्ष तथा अभियन्ता दुर्गा प्रसाईँले भन्नु भएको छ ।
उहाँले भन्नु भयो,–‘मानिसलाई भूमिहीन बनाउने तथा सुकुम्बासी बनाउने काम तत्काल बन्द गरियोस् ।’
अभियन्ता प्रसाईँले भारतको उदाहरण पनि दिनु भएको छ । उहाँले ‘धेरै टाढा उदाहरण खोज्नै पर्दैन, छिमेकी भारतमै कुनै गाउँमा रेलवे ट्र्याक वा सडक सञ्जाल विस्तार गर्नुपर्ने भएमा त्यहाँका नागरिकहरू सबैभन्दा धेरै खुसी हुन्छन्। किनकि त्यहाँ सरकारले व्यक्तिका जग्गा–जमिनमा काम गर्नुपरेमा सरकारी दरभन्दा तीन गुणा बढी मुआब्जा पहिला नै दिएरमात्रै परियोजना अघि बढाउँछ।’
महाअभियानका अध्यक्ष प्रसाईँले भारतको भन्दा नेपालमा ठीक उल्टो भएको भन्दै सरकारलाई खवरदारी गर्नु भएको छ । उहाँले भन्नु भयो,– ‘राज्य भक्षक होइन, रक्षक बनोस्, हामी सरकारसँग निरन्तर वार्ता र संवादमा छौं।, बार्ता नटुटोस्, छलफल नै समाधान हो। सडक बिस्तारको लागि बैकल्पिक मार्ग पनि पर्योग गर्न सकिन्छ। राज्यको काम जनतालाई विस्थापित गर्नु होइन, सुरक्षित राख्नु हो।’
सडक डिभिजन हेटौँडाले मंसिर ५ गते १५ दिने सूचना जारी गर्दै मंसिर २० गतेदेखि हेटौँडाको रातोमाटेदेखि बुद्धचोक हुँदै राप्ती पुलसम्म र बुद्धचोकदेखि सामरीसम्मका ५ सय ३१ घर टहरा हटाउने तयारी गरेको छ ।
