काठमाडौं । सर्वोच्च अदालतले ललितपुरको गोदावरी क्षेत्रका ऐतिहासिक र पुरातात्त्विक सम्पदाको संरक्षण नगरेको विषयमा कारण देखाउ आदेश जारी गरेको छ।
अधिवक्ताहरू चिरञ्जीवी नेपाल र राजाराम श्रेष्ठले दायर गरेको रिटमा प्रारम्भिक सुनवाइपछि न्यायाधीश सुनिलकुमार पोखरेलको इजलासले नगरपालिका र नगरकार्य समितिका नाममा कारण देखाउ आदेश जारी गरेको हो।
न्यायाधीश पोखरेलको इजलासले अधिवक्ताद्वयको रिटलाई अग्राधिकार प्रदान गर्ने आदेश गरेको छ।
ललितपुर क्षेत्रमा छैठौँ शताब्दीदेखिका धार्मिक, सांस्कृतिक र पुरातात्त्विक महत्त्वका ऐतिहासिक सम्पदाहरू भए पनि पुरातत्त्व विभागदेखि स्थानीय सरकारसम्मले संरक्षणमा ध्यान नदिँदा मासिने जोखिममा रहेको रिट दाबी छ।
रिटमा तत्काल सम्पदाको सूचीकरणका लागि स्थानीय सरकारका नाममा आदेश माग गरिएको छ।
