काठमाडाैं । यही मंसिर ३ गते बारा जिल्लामा उत्पन्न भएको हिंसात्मक झडपबाट सिर्जित संवेदनशील परिस्थितिप्रति गैरसरकारी संस्था महासंघ नेपालको गम्भीर ध्यानाकर्षण भएको छ ।
उक्त घटना कारण स्थानीय विमानस्थल बन्द हुनु, सर्वसाधारणको आवतजावत अवरुद्ध हुनु, विद्यालय तथा व्यावसायिक गतिविधि ठप्प हुनु, स्थानीय बासिन्दामा डर त्रास फैलिनु, र समग्रमा शान्ति सुरक्षा व्यवस्था खलबलिनु अत्यन्त चिन्ताजनक विषय हो । लोकतान्त्रिक मूल्य र सिद्धान्तअनुसार सभा, जुलुस, भेला तथा अभिव्यक्ति संविधानले प्रदान गरेका मौलिक अधिकार हुन् । यिनको निर्वाध प्रयोग गर्न पाउने वातावरण कमजोर हुँदै जानु जनतामा भए–आतंक बढ्नु तथा शान्ति–सुरक्षा शिथिल हुनु अत्यन्त गम्भीर चिन्ताको विषय हो ।
जेनजी र सरकारबीचको सहमतिअनुसार निर्वाचनको मिति घोषणा भइसकेको वर्तमान परिवेशमा, यस्ता घटनाले निर्वाचनको वातावरण बिगार्ने, अविश्वास बढाउने तथा अराजकता निम्त्याउने सम्भावना रहेकाले राजनीतिक दलहरुलाई स्वतन्त्र, सुरक्षित र सहज रुपमा भेला हुने वातावरण निर्माण गर्नु सरकारको प्रमुख जिम्मेवारी हो । समयमै स्वच्छ, निष्पक्ष र स्वतन्त्र निर्वाचन सम्पन्न गर्न शान्ति–सुरक्षा मजबुत हुनु पहिलो पूर्वशर्त हो भन्ने विषयमा महासंघ सरकारको ध्यानाकर्षण गराउन चाहन्छ ।
गैरसरकारी संस्था महासङ्घ नेपाल, लोकतन्त्र, संविधान र मानवअधिकारका आधारभूत मूल्यप्रति पूर्ण प्रतिबद्ध रहँदै सरोकारवालामाझ जवाफदेहिता अभिवृद्धि गर्ने, नागरिक समाजको ऐतिहासिक योगदानको रक्षा गर्ने तथा नेपालको गैरसरकारी संस्थाहरूको छाता संगठनको रूपमा निरन्तर सक्रिय रहँदै आएको छ ।
यसै सन्दर्भमा, गैरसरकारी संस्था महासंघ नेपाल उक्त घटनाको सत्य–तथ्य छानबिन गरी दोषीमाथि कडा कारबाही गर्न, तथा तत्काल शान्ति–सुरक्षा सुनिश्चित गर्न सरकारसँग जोडदार माग गर्दछ ।
