काठमाडाैं । अशोक राई नेतृत्वको जनता समाजवादी पार्टी (जसपा)ले नेपाली कम्युनिस्ट पार्टी (नेकपा)सँग एकताका लागि पहल गर्ने भएको छ ।
एकताका लागि दुवै पार्टीबिच अन्तिम वार्ता हुने सो पार्टीका उपाध्यक्ष परशुराम बस्नेतले जानकारी गराए । उनले भने, ‘हामीले नेकपासँग एकता गर्ने भयौँ, तर त्यसअघि हाम्रा पार्टीका विषयमा पनि छलफल हुन्छ ।’
छलफलमा सहमति भएपछि एकताको घोषणा उनको जानकारी दिए । मंगलबार कार्यकारणी बैठकमा सर्वसम्मतिले यो निर्णय भएको पनि उनको दाबी छ । तर जसपाका उपमहासचिव प्रदीप यादवले भने नेकपासँग एकता गर्ने कुनै सहमति नभएको दाबी गरेका छन् ।
‘नेकपाको एजेन्डा के हो, मुद्दा के हो ? डकुमेन्टहरू के–के हुन् त्यो विषयमा बुझ्नका लागि मात्रै नेकपासँग कुराकानी गर्न आज छलफल भएको हो,’ उनले भने, ‘एकता नै गर्ने कुरा निर्णय भएको छैन ।’
यस विषयमा नेपाली कम्युनिस्ट पार्टीको आधिकारिक धारणा आउन भने बाँकी छ ।
