काठमाडौं । नेपाल प्रिमियर लिग (एनपीएल)को दोस्रो संस्करणको पहिलो खेलमा काठमान्डु गोर्खाजले साविक वितेजा जनकपुर बोल्ट्सलाई ५ विकेटले हराएको छ।
त्रिवी क्रिकेट स्टेडियममा टस हारेर ब्याटिङ गरेको जनकपुर बोल्ट्सले निर्धारित २० ओभरमा ६ विकेट गुमाउँदै १३० रन बनाएको थियो। जनकपुरले दिएको १३१ रनको विजयी लक्ष्य पछ्याएको काठमान्डु गोर्खाजले १८ ओभरमा ५ विकेट गुमाउँदै १३१ रनको लक्ष्य पूरा गरेको हो।
त्यसअघि ब्याटिङ गरेको जनकपुर बोल्ट्सका लागि मार्की खेलाडी रहेका आसिफ शेखले सर्वाधिक ५४ रनको अर्धशतकीय पारी खेले। उनले ४१ बलमा ६ चौका र १ छक्का प्रहार गरेका हुन्।
ओपनर लाहिरु मिलान्थाले ७ रन बनाउँदा कप्तान अनिल शाह डकआउट भए। निकोल लोफ्टी इटोन र सञ्जय कृष्णमुर्ति समान २-२ रनमा पेभेलियन फर्किए।
१० ओभरको खेल सकिँदा जनकपुर बोल्ट्सले ४ विकेटको क्षतीमा ५६ रन बनाएको थियो। १७ ओभरमा ५ विकेट गुमाउँदै १०० रन पूरा गरेको हो। जनकपुरका लागि मयन यादव र लाहिरु समाराकोनले छैटौं विकेटका लागि ४८ रनको साझेदारी गरेका थिए। मयन यादव ३४ र किशोर महतो ४ रनमा अविजित रहे।
काठमान्डु गोर्खाजको लागि अमेरिकन अलराउन्डर मिलिन्द कुमारले सर्वाधिक ३ विकेट लिए। साहब आलम, करण केसी र सन्तोष यादवले १-१ विकेट लिए। काठमान्डु गोर्खाजले बुधबार सुदूरपश्चिम रोयल्ससँग खेल्नेछ। जनकपुरको दोस्रो खेल अर्को हप्ता सोमबार विराटनगर किंग्ससँग खेल्नेछ।
मंगलबार डबल हेडर रहेको छ। पहिलो खेलमा चितवन राइनोज र कर्णाली याक्सबीचकाे खेल अहिले जारी छ । भने दोस्रो खेलमा विराटनगर किंग्स र पोखरा एभेन्जर्स भिडेनेछ।
