काठमाडौं । मन्त्रिपरिषद्ले सोमबार प्रहरीको ३३ औँ महानिरीक्षक (आईजीपी)मा दान बहादुर कार्कीलाई नियुक्त गरेको छ । गुल्मीको मालिका गाउँपालिका वडा नम्बर–७ घमिरमा जन्मे हुर्केका कार्कीले कार्तिक २७ बाट ७९ हजार ५४१ जना फौजको कमान्ड समाल्नेछन् ।
आईजीपी हुने प्रतिस्पर्धामा कार्कीसँगै उनका व्याचमेट एआईजीद्वय राजन अधिकारी र डा. मनोज कुमार केसी थिए । एआईजी सिद्धि बिक्रम शाह पनि आईजीपीको दाबेदार थिए । तर, कार्की उनीहरू सबैको ‘कमान्डर’ बनेका छन् ।
कार्कीले २०८१ मा दसैँ रमाइलो बोलको गीत ल्याएका थिए। आँखा झिमझिम भो र गुन्यु चोली पटुकी बोलको गीत यसअघि नै सार्वजनिक गरिसकेका छन् ।
डीएसपी हुँदा प्रहरी वृत्त नयाँ बानेश्वरको कमान्ड गरेका कार्की त्यसपछि जिल्ला प्रहरी कार्यालय सप्तरी गए । एसपी हुँदा उनले कास्की र कपिलवस्तुको कमान्ड गरेका थिए । एसपी भएपछि उनले जिल्ला प्रहरी परिसर काठमाडौँका कमान्ड गरे । डीआईजीमा उनले लुम्बिनी प्रदेशको कमान्ड गरे ।
एआईजीमा बढुवा भएपछि उनले प्रहरी प्रधान कार्यालयको मानवश्रोत विकास विभाग र उपत्यका प्रहरी कार्यालयको कमान्ड गरे । यसरी उनले इन्स्पेक्टर पदबाट आईजीपी सम्मको यात्रा तय गरेका छन् ।
आईजीपी यात्रा
- २०५४ चैत १८ : इन्स्पेक्टर
- २०६६ मङ्सिर २६ : डीएसपी
- २०७४ साउन १९ : एसपी
- २०७९ साउन ३ : एसएसपी
- २०८१ जेठ १३ : डीआईजी
- २०८२ वैशाख ११ : एआईजी
- २०८२ कार्तिक २४ : आईजीपी (कार्तिक २७ बाट लागु हुने)
नयाँ गीत ल्याउँदै
जेनजी प्रदर्शनमा उच्छृङखल समूहले आगजनी गर्न थालेपछि काठमाडौँ उपत्यकामा रहेका अधिकांश प्रहरी कार्यालय खरानीमा परिणत भए । आगजनीको दृश्य कार्कीले भदौ २४ मा सड्क र जहाजबाट पनि नियाले । तत्कालीन प्रधानमन्त्री केपी शर्मा ओलीले राजीनामा दिएपछि चारवटै सुरक्षा निकायका प्रमुखसँगै कार्की पनि बालुवाटारबाट सेनाको हेलिकप्टरमा सेनाको मुख्यालय जङ्गी अड्डा जाँदै थिए ।
सिंहदरबारमा प्रदर्शनकारीले आगजनी गरेको प्रहरीको सञ्चारसेट ‘वाकीटकी’मा बजिरहेको थियो । सुरक्षा प्रमुखहरू सिंहदरबार क्षेत्रको दृश्य हेर्दै जङ्गी अड्डामा ओर्लिए । त्यसैदिन उनले कमान्ड गरेको रानीपोखरी स्थित उपत्यका प्रहरी कार्यालयको भवन पनि खरानीमा परिणत भैसकेको थियो । त्यसभन्दा पछाडि दुई महिना उपत्यका कमान्ड गरेका कार्कीले नयाँ गीत लेखे, ‘आमा मत फर्केर आएँ, खरानीबाट उठेर आएँ ।’
खरानीको थुप्रोबाट उठेर सुरक्षाकर्मीहरू सेवामा फर्किएको भावको सो गीत कार्कीले केही दिनमा सार्वजनिक गर्ने तयारी गरेका छन् । राष्ट्र प्रेमले ओतप्रोत सो गीत केही दिनमा सार्वजनिक गर्नेगरी रेकर्डिङको काम भइरहेको सङ्गीतकार तथा गायक थानेश्वर गौतमले बताए । उनले भने, ‘नवनियुक्त आईजीपी कार्कीले लेखेको राष्ट्र प्रेमले ओतप्रोत गीत केही दिनमा सार्वजनिक हुँदै छ ।’
