काठमाडौं । नेपालमा पहिलो पटक हरर फिल्म महोत्सव सुरु भएको छ । ‘काठमाडौं हरर चलचित्र महोत्सव २०२५’ नाम दिइएको महोत्सव कमलपोखरीस्थित रसियन कल्चर सेन्टरमा शुक्रबारबाट सुरु भएको हो । महोत्सवको उद्घाटन चलचित्र विकास बोर्डका अध्यक्ष दिनेशराज दाहालले गरे ।
महोत्सवको आयोजना नेपाल चलचित्र तथा सांस्कृतिक प्रतिष्ठानले गरेको हो । प्रतिष्ठानका उपाध्यक्ष शिव पुरीले प्रतिष्ठानले नेपालमै पहिलोपटक ‘काठमाडौं हरर फिल्म महोत्सव २०२५’ आयोजना गरेर रचनात्मक यात्राको सुरुवात गरेको जनाए । उनले कल्पना, कथा वाचन र चलचित्रको विश्वव्यापी भाषालाई महोत्सव उत्सवको रूपमा लिनुपर्ने धारणा राखे ।
‘हरर भन्ने विधा केवल त्रास उत्पन्न गर्ने मात्र होइन । यो मानवीय संवेदना, मनोविज्ञान र आत्मचिन्तनको गहिरो आवाज पनि हो,’ उनले थपे– ‘यसले हामीलाई हाम्रो डर मात्र होइन, हाम्रो अस्तित्व र चेतनासँग जुध्न पनि सिकाउँछ ।’
कार्यक्रममा वरिष्ठ निर्देशक तुलसी घिमिरेले महोत्सवको महत्वको विषयमा प्रकाश पारेका थिए । ‘हेलोविन डे’ को अवसर पारेर सुरु भएको महोत्सव नोभेम्बर २ (१६ कात्तिक) सम्म चल्नेछ । महोत्सवमा १५ देशका २५ हरर फिल्म प्रदर्शन हुनेछन् ।
_btJSFG0L6c.jpg)
आयोजक नेपाल चलचित्र तथा सांस्कृतिक प्रतिष्ठानका अध्यक्ष केपी पाठकका अनुसार विश्वभरबाट प्राप्त १०० भन्दा बढी फिल्ममध्ये गुणस्तर, मौलिकता र विषयगत विविधताको आधारमा यी फिल्महरू छनोट गरिएको हो । फिल्मको आह्वान अन्तर्राष्ट्रिय प्लेटफर्म फिल्म फ्री वेमार्फत गरिएको थियो ।
महोत्सवमा सहभागी फिल्महरूबिच प्रतिस्पर्धा हुनेछ, जसमा उत्कृष्ट फिचर फिल्म, उत्कृष्ट लघु फिल्म र उत्कृष्ट युवा फिल्म गरी तीन विधामा पुरस्कार प्रदान गरिनेछ ।
महोत्सवको सुरुवात मिखाइल मज्र्लिकिन निर्देशित फिल्म ‘शमन’बाट भएको छ । महोत्सवको निर्णायक मण्डलमा फोटोग्राफर राजभाइ सुवाल, फिल्म समीक्षक होसाम फाह्मी, र अन्तर्राष्ट्रिय कलाकार यास्मिन बुछफार रहेका छन् ।
यस्ता छन् सहभागी फिल्म-
