काठमाडौं । आईसीसी विश्वकप लिग २ अन्तर्गत आफ्नो १७औं खेलमा नेपाल अमेरिकासँग १०६ रनको फराकिलो अन्तरले पराजित भएको छ । दुबई अन्तर्राष्ट्रिय क्रिकेट रंगशालामा २ सय ६३ रनको लक्ष्य लिएर आएको नेपाल ३९.१ ओभरमा १ सय ५६ रनमै अलआउट भयो ।
यस जितसँगै अमेरिका लिग २ को शीर्ष स्थानमा उक्लेको छ । अमेरिकाले २१ खेलमा ३० अंक जोडेको छ । स्कटल्यान्डको २४ खेलमा ३० अंक भए पनि अमेरिकाभन्दा नेट रन रेटमा पछाडि छ । आठ राष्ट्र सहभागी प्रतियोगितामा नेपाल १७ खेलमा १२ अंकका साथ सातौं स्थानमा छ ।
ठूलो लक्ष्य पछ्याउने क्रममा नेपाल पहिलो ओभरमै धर्मरायो । दोस्रो बलमै ओपनर कुशल भुर्तेललाई गुमाएको नेपालले त्यसपछि राम्रो सुरुवात गर्न सकेन । दोस्रो विकेटका लागि भीम सार्की र आशिफ शेखले ६९ रनको साझेदारी गरे पनि लगातार ती दुवै ब्याटर आउट भएपछि नेपालको ब्याटिङ अर्डर कोल्याप्स नै भयो ।
कप्तान रोहित पौडेल आज पनि १९ बल खेलेर जम्मा २ रन बनाएर आउट भए । दीपेन्द्र सिंह ऐरीले ४०, आरिफ शेखले २० र सोमपाल कामीले ११ रन बनाउनु बाहेक अन्य ब्याटरहरुले दोहोरो अंकमा रन बनाउन सकेनन् ।
