काठमाडौं । काठमाडौं महानगरपालिकाको शुक्रबार बसेको ४३ औँ नगर कार्यपालिका बैठकमा गत भदौ २३ र २४ गते भएको जेन-जी आन्दोलनका क्रममा लुकेको भन्दै मेयर बालेन्द्र साह र उपमेयर सुनिता डङ्गोलको भूमिकाबारे प्रश्न उठेको छ ।
बैठकमा बोल्ने क्रममा काठमाडौंमा त्यति ठूलो आन्दोलन हुँदा मेयर र उपमेयर बेपत्ता भएको भन्दै वडाध्यक्षले प्रश्न उठाएका हुन् ।
‘त्यति ठूलो आन्दोलन भएको थियो । फेरि हाम्रै महानगरपालिकाभित्र आन्दोलन केन्द्रित थियो’, उनले भने, ‘अहिले उहाँहरू देखिनु भएको छ त्यत्रो आन्दोलन भइरहँदा, आगजनी हुँदा मेयर र उपमेयर कहाँ थिए ? उहाँहरूको कर्तव्य के थियो ?’
उनले अहिले सहज भइसकेपछि अनेकथोक चाहियो भन्न सक्ने तर असहज परिस्थितिमा भूमिका देखाउन नसक्ने भन्दै आलोचना गरे । ‘तपाईंहरू दुईजना भदौ २३ र २४ गते जेन-जी आन्दोलन हुँदा कहाँ हुनुहुन्थ्यो ?’, उनले बैठकमा बालेन्द्र र सुनितालाई सोधे ।
तण्डुकारले अहिले पनि आफूहरूले मेयर बालेन्द्र साहलाई सम्मान र आदर गरिरहेको बताए । तर बालेनले त्यो सम्मान र आदरको इज्जत गर्न नसकेको उनले बताए । ‘हामीले गरेको सम्मानलाई मेयरले कायम राख्न सकेनन्’, तण्डुकारले भने, ‘हामीले जुन विश्वास गरेका थियौँ, त्यसअनुसारको आफ्नो छवि उनले कायम राख्न सकेनन् ।’
