काठमाडाैं । समावेशी कला महोत्सव सम्भव २०२५ मा नेपालको चमक : रोमा न्यौपाने र चिराग पोख्रेलको सहभागिता भारतमा अक्टोबर ४ र ५ मा सम्पन्न दक्षिण एशियाको प्रतिष्ठित समावेशी कला महोत्सव सम्भव २०२५ मा नेपालबाट कलाकार रोमा न्यौपाने र उनका १७ वर्षिय छोरा चिराग पोख्रेलले सहभागिता जनाउँदै देशलाई अन्तर्राष्ट्रिय मञ्चमा प्रतिनिधित्व गरेका छन्।
दक्षिण एशियाका साथै विश्वका १२ देशका कलाकारहरुको उपस्थिति रहेको यस वर्षको सम्भव महोत्सवमा शारीरिक असक्षमता भएका कलाकारदेखि लैङ्गिक तथा सामाजिक विभेदमा परेका व्यक्तिहरूले आफ्ना कला, आवाज र प्रतिभा प्रस्तुत गरे।
नेपालका तर्फबाट युवा प्रस्तुतिकर्ता चिराग पोख्रेल ले “Artists with Disabilities for an Inclusive Society” शीर्षकमा प्रभावशाली PowerPoint प्रस्तुति दिँदै समावेशी समाज निर्माणमा कला र सचेतनाको भूमिकाबारे आफ्ना विचार प्रस्तुत गरे। साथै, रोमा न्यौपाने र चिराग पोख्रेलको संयुक्त प्रस्तुति ले कार्यक्रममा उपस्थित दर्शक र निर्णायकलाई मन्त्रमुग्ध बनायो। शारीरिक असक्षमता हुँदाहुँदै पनि आफ्नो प्रतिभा र संघर्षमार्फत समाजलाई प्रेरित गर्दै आएका रोमा न्यौपानेको यो अन्तर्राष्ट्रिय स्तरको प्रस्तुति नेपालका समावेशी कलाकारहरूको लागि नयाँ ऊर्जा र आशाको स्रोत बनेको छ।
SAMBHAV जस्तो अन्तर्राष्ट्रिय मञ्चमा नेपालको सहभागिता कला र समावेशी समाज निर्माणतर्फको सशक्त कदमका रूपमा हेरिएको छ।
