पोखरा । हिमाली संस्कृति र वैदिक दर्शनका विविध पक्षहरूबारे अनुसन्धान र विमर्श गर्न उद्देश्यले ‘तेश्रो ऋग्वैदिक हिमालय अन्तर्राष्ट्रिय सम्मेलन (क्ष्ऋच्ज्(ण्द्दछ)’ पोखरामा आगामी मङ्सिर २१ र २२मा आयोजना गरिने भएको छ ।
सम्मेलनको पहिलो संस्करण सन् २०२३ मा, दोस्रो संस्करण सन् २०२४ मा पोखरामा भव्य रूपमा सम्पन्न भइसकेको छ । यस बर्ष सम्मेलनको मुख्य विषयका रुपमा ‘समृद्धिका लागि हिमाली संस्कृति’ तोकिएको छ भने ‘कालिगण्डकी उपत्यका ः हिमाली संस्कृतिको एक उद्भव स्थल’ भन्ने उपशीर्षकमा केन्द्रित रहनेछ । सम्मेलनको प्रारम्भिक प्राज्ञिक तयारी गर्न असार ४ गते कीर्तिपुरमा बसेको सम्मेलन प्राज्ञिक समितिको बैठकले यस
सम्बन्धमा आवश्यक निणर्य गर्दै सम्बन्धित विज्ञहरुबाट कार्यपत्र पेश गर्न आह्वान गरेको छ ।
यस सम्मेलनले वैदिक दर्शन र मूल्यहरूसँग हिमाली संस्कृतिहरूको अन्तर्सम्बन्ध उजागर गर्ने, कालिगण्डकी उपत्यकाको भौगोलिक, ऐतिहासिक, धार्मिक तथा पर्यटकीय महत्व प्रचार गर्न तथा युवा विद्यार्थी र अनुसन्धानकर्ताहरुको ध्यान हिमाली अध्ययनतर्फ आकर्षित गर्न पनि मद्धत गर्ने अपेक्षा गरिएको छ । साथै सम्मेलनमा विभिन्न क्षेत्रका विज्ञहरुबाट भएका अध्ययन अनुसन्धानसँग सम्बन्धित शैक्षिक कार्यपत्र प्रस्तुतिकरण, युवा अनुसन्धानकर्ता बिचमा नेटवर्किङ लगाएत महत्वपूर्ण साँस्कृतिक प्रर्दशनी र शेसनहरु रहनेछन् ।
बैठकले सम्मेलनसँग सम्बन्धित महत्वपूर्ण मितिहरु निम्नानुसार निर्धारण गरेको छ । लेख रचनाको सारांश पठाउने अन्तिम म्यादः साउन १६, २०८२, स्वीकृतिको सूचनाः भदौ १५, २०८२, पूर्ण कार्यपत्र पठाउने म्यादः असोज ३, २०८२ र पूर्ण कार्यपत्रको स्वीकृति सूचनाः कात्तिक १४, २०८२ रहने गरी निर्धारण गरेको छ । सम्मेलनमा नेपालका प्रमुख विश्वविद्यालय, शैक्षिक तथा अनुसन्धान संस्थाहरूका प्राध्यापक, विद्यार्थी, स्वतन्त्र अनुसन्धानकर्ता, सरकारी निकायका प्रतिनिधि, अन्तर्राष्ट्रिय विद्वान तथा हिमाली क्षेत्रका बौद्धिक अगुवाहरूको सहभागिता अपेक्षित गरिएको छ ।
