काठमाडौं । दिवंगत राजपरिवारका सदस्यको सम्झनामा कमलादीस्थित गणेश मन्दिरमा आयोजित दीप प्रज्वलन कार्यक्रममा नेकपा (माओवादी केन्द्र)को भ्रातृ संगठन योङ कम्युनिष्ट लिग (वाइसिएल)का कार्यकर्ताले ढुंगा प्रहार गरेका छन्।
पूर्वयुवराज्ञी हिमानी शाह र पूर्वनवयुवराज हृदयेन्द्र शाहसहित राजपरिवारका अन्य सदस्यहरूले दिवंगत राजपरिवारलाई श्रद्धाञ्जलि अर्पण गर्दै दीप प्रज्वलन गरिरहँदा वाइसिएलका कार्यकर्ताले ढुंगा हानेका हुन्।
सोमबार नेपाल प्रज्ञा प्रतिष्ठानमा वाइसिएलको कार्यक्रम थियो। उनीहरूले त्यहीँबाट राजसंस्थाविरुद्ध ‘रैती रैती’ भन्दै नाराबाजी गर्दै ढुंगा प्रहार गरेका हुन्।
वाइसिएलले दीप प्रज्वलन कार्यक्रममा ‘गणतन्त्र मुर्दावाद’को नारा लागेपछि ढुंगा प्रहार गरेको दाबी गरे पनि त्यहाँ त्यस्तो कुनै नारा नलागेको प्रत्यक्षदर्शीले जनाएका छन्। दीप प्रज्वलनमा सहभागीले ‘राजा वीरेन्द्र अमर रहून्’ भन्ने नारा लगाएका थिए।
ढुंगा प्रहार गरेपछि वाइसिएका कार्यकर्तालाई प्रहरीले प्रज्ञा भवनभित्रै रोकेको थियो।
