काठमाडौं । राइड सेयरिङ रोक्नु पर्ने माग गर्दै सार्वजनिक यातायात व्यवसायीहरूले आजबाट देशभर सार्वजनिक यातायात ठप्प पारेका छन् ।
सोमबार बिहानैदेखि निजी सवारी बाहेक बस, टयाम्पो, ट्रक, मिनीबस, जिप, माइक्रो बसलगायतका सार्वजनिक यातायात सवारीसाधन चलेका छैनन् ।
यसको प्रभाव काठमाडौँ उपत्यकामा देखिएको छ । एकाबिहानैबाट गनत्वयमा निस्किएका यात्रु अलपत्र परेका छन् ।
सार्वजनिक यातायात केन्द्रीय महासंघ नेपाल, नेपाल यातायात व्यवसायी राष्ट्रिय महासंघ, ढुवानी व्यवसायी महासंघ, नेपाल, नेपाल यातायात स्वतन्त्र मजदुर संगठन, नेपाल यातायात मजदुर संघलगायतले आइतबार साँझ संयुक्त विज्ञप्ति निकाली सोमबारदेखि सार्वजनिक सवारीसाधन ग्यारेजमा थन्काएर आन्दोलनमा उत्रिने निर्णय गरेको जनाएका थिए ।
आफूहरूले राखेका माग सरकारले सुनुवाइ नगरकाले सोमबारदेखि आन्दोलनमा उत्रिन बाध्य भएको उनीहरूको भनाइ छ।
