काठमाडौं । काठमाडौं महानगरपालिकाकी उपप्रमुख सुनिता डंगोलले कानुन कार्यान्वयनको पक्षलाई बलियो बनाउने गरी देशभर बहस हुनुपर्ने जनाएकी छन् ।
शुक्रबार कानुन दिवसका अवसरमा काठमाडौंमा आयोजित कार्यक्रममा उनले यस्तो बताएकी हुन् । उनले कानुन नेपालमा हरेक क्षेत्रसँग सम्बन्धित कानुनको चाङ रहेको तर कार्यान्वयनको पक्ष कमजोर रहेको बताइन् । कानुन निर्माण मात्रै मुख्य कुरा नभइ कानुनको सही ढंगले कार्यान्वयन गर्नु महत्त्वपूर्ण भएको जनाइन् ।
उनले कानूनको सही कार्यान्वयन र परिपालना नहुँदा कानुनको कुनै अर्थ नहुने जनाइन् । निर्माण भएका कानुन व्यवहारिक र समय सापेक्ष छ कि छैन भनेर कानुनको समीक्षा गर्ने समय भएको उनको धारणा छ ।
उनले स्थानीय स्तरमा न्याय सम्पादन गर्नका लागि काठमाडौंं महानगरपालिकाको हरेक वडामा न्यायिक मेलमेलाप केन्द्र स्थापना गरिएको उनको भनाइ छ । उनले वडामा स्थापना भएका महिला सञ्जाल र मेलमिलाप केन्द्रका कारण मेलमिलाप गर्न आउनेको संख्या बढेको जनाइन् ।
काठमाडौं महानगरपालिकाको प्रत्येक वडामा निःशुल्क रुपमा मेलमिलाप सेवा दिइ रहेको उनको धारणा छ । उनले भनिन्,’कानुन दिवसको अवसरमा कानुनकै विषयमा छलफल सँगसँगै कानूनका विषयमा छलफल मात्रै नभएर हामीले कानूनी राज्य कसरी स्थापना गर्ने ? कानुनलाई कसरी महशुस गर्ने ? र सँगसँगै कानुन बन्ने र कानूनको कार्यान्वयनको पक्षलाई कसरी बलियो बनाउने भन्ने विषय देशैभरी हरेक संघसंस्थामा कानुनसँग जोडिएका सरोकारवाला निकायहरुबीच पनि बहस हुनु जरुरी छ ।’
ललितपुर महानगरपालिकाकी उपप्रमुख मञ्जली शाक्य बज्रचार्यले न्यायिक मनबाट न्याय दिनका लागि न्यायिक समितिको दायरा फराकिलो पार्नुपर्ने बताइन् । उनले न्याय सम्बन्धीको विषयमा संविधान र स्थानीय सरकार सञ्चालन ऐन दुविधामा रहेको जनाइन् ।
उनले ऐनमा भएका दुविधाहरु तत्काल संशोधन गर्नुपर्नेमा जोड दिइन् । जिल्ला अदालत, उच्च अदालत वा सर्वोच्च अदालतमा न्यायका लागि मुद्दा दर्ता गर्नुपर्दा पीडितसँग न्यायाधीशहरुको प्रत्यक्ष सम्बन्ध वा भेटघाट नहुने भएकाले सही न्याय पाउनमा समस्या हुने जनाइन् ।
