एजेन्सी । पाकिस्तानले छिमेकी भारतले आफ्नो मुलुकभित्र अनेक षडयन्त्र गरेको आरोप लगाएको छ । भारतीय जम्मु–कश्मीरको पहलगाममा अघिल्लो साता भएको आक्रमणबारे जनाउँदै पाकिस्तानी सेनाका जर्नेलले भारतले पाकिस्तानभित्र आतंकवाद फैलाउन खोजेको उल्लेख गरेका छन् ।
पाकिस्तानी इन्टरसर्भिस पब्लिक रिलेसन्सका महानिर्देशक लेफिट्नेण्ट जनरल अहमद सरिफ चौधरीले पहलगाम घटनालाई लिएर पाकिस्तानमाथि लगाइएका सबै आरोप झुठ्ठो भएको दाबी गरे । उनले भने, ‘पाकिस्तानी नागरिक सैनिकलाई मार्ने षड्यन्त्र रचिएको प्रमाणहरु भेटिएको छ ।’
अस्ति आयोजित पत्रकार सम्मेलनमा घटनासँग सम्बन्धित प्रमाण भन्दै ‘२५ अप्रिलमा पक्राउ परेका भारतीय आतंकवादी अब्दुल मजिदलाई भारतीय सेनाले परिचालन गरेको’ जनाए । उनको साथबाट बम र ७० हजार बरामद भएको बताइन्छ । त्यसपछि प्रहरीले उनको घरमा छापा मार्दा भारतमा बनेको ड्रोन र १० लाख रुपियाँ फेला परेको हो । भारतीय सेनाका सुबेदार सुकबिन्दरले उनलाई पठाएका म्यासेजहरु पनि भेटिएको दाबी छ ।
म्यासेजमा उनले बम राख्न लगाएको स्थानबारेको अडियो पनि पत्रकार सम्मेलनमा सुनाइएको छ । पाकिस्तानी सेनाका अनुसार आतंकवादी गतिविधिमा मुछिएका अन्य चार जनाको पहिचान खुलेको छ । तीमध्ये सन्दिप वर्मा भारतीय सेनाका कमाण्डर हुन् । त्यसैगरी, अदिल अमन र हल्विन्दर अमित पनि भारतीय सैनिक हुन् ।
फोनमा कुराकानीको उनीहरुले बलुचिस्तानदेखि लाहोरसम्म आतंक फैलाउने जनाएको सुनिन्छ । मिडिया बढी भएको ठाउँमा बम पड्काएर पाकिस्तानलाई अशान्त देशको रुपमा विश्वभर बद्नाम गर्ने उद्देश्य भारतको रहेको पाकिस्तानी आरोप छ । सरिफको निश्कर्ष छ, ‘भारतले क्रस बोर्डर आतंकवाद शुरु गरेको छ । तर, पाकिस्तान ढग्मगाउँदैन ।’
यता भारतले उक्त आक्रणको सम्पूर्ण दोष पाकिस्तानमाथि थोपरेको छ । पाकिस्तानले आतंकवादी समूहलाई सहयोग पुर्याउँदै आएको एकोहोरो दाबी भारतको छ ।
