काठमाडौं । काठमाडौं महानगरपालिकाले कुकुर बिरालो दर्ता अभियान थालनी गरेको छ । स्वदेशी कुकुर निःशुल्क दर्ता हुने छ भने विदेशी कुुकुर वा बिरालो दर्ताका लागि मालिकले २ हजार रुपैयाँ शुल्क तिर्नुपर्ने छ ।
महानगरपालिकाले दर्ता भएका कुकुर बिरालोमा माइक्रो चिप्स जडान गरिदिने छ । यसरी चिप्स जडान गरेको कुकुर बिरालो हराएमा खोज्न सजिलो हुने मेयर बालेन्द्र शाहले जनाएका छन् ।
कुकुर बिरालो दर्ता अभियानका सन्दर्भमा मेयर बालेन्द्रले जानकारीमूलक भिडियोसहित ‘घरपालुवा जनावरको सुरक्षाका लागि माइक्रोचिप अनिवार्य लगाऔँ’ शीर्षकमा एउटा सूचना प्रकाशित गरेका छन् ।
हेर्नुहोस् सूचना–
घरमा पाल्ने कुकुर, बिरालो जस्ता जनावर हाम्रो परिवारको हिस्सा पनि हो । बेला–बेलामा यस्ता घरपालुवा जनावरहरु हराएको, चोरी भएका गुनासो काठमाडौं महानगरपालिकामा आउने गरेका छन् । सो समस्याको समाधान माइक्रो चिपिङ मार्फत गर्न सकिन्छ । त्यस कारण हामीले माइक्रो चिपिङ कार्यक्रमलाई अभियानको रुपमा अगाडि बढाउँदै छौं ।
काठमाडौं महानगरपालिकाले कुकुर–बिरालो व्यवस्थापन, नियन्त्रण र दर्ता कार्यविधि, २०७९ जारी गरेको छ । यस कार्यविधिको दफा ३ (च) मा महानगर क्षेत्रभित्रका घरपालुवा कुकुर र बिरालोको दर्ता अनिवार्य गरिएको छ । यसअनुसार, महानगरपालिकाले कुकुर-बिरालो दर्ता तथा माइक्रो चिपिङ कार्यक्रम सञ्चालन सुरु गरेको छ ।
काठमाडौं महानगरपालिकाको ‘आर्थिक ऐन २०८१’ अनुसार, नेपाली जातका सामुदायिक कुकुर वा बिरालो घरमा पालेर आफ्नो नाममा दर्ता गराएमा वडाबाट निःशुल्क दर्ता गरिनेछ । तर, विदेशी जातका कुकुर वा बिरालोको हकमा भने प्रतिजनावर रु. २,००० सेवा शुल्क लाग्ने व्यवस्था गरिएको छ ।
कार्यविधिको दफा ७ अनुसार, कुकुर बिरालोमा माइक्रोचिप लगाएर सम्बन्धित वडा कार्यालयमा दर्ता गराउने दायित्व स्वयम कुकुर बिरालो पाल्ने व्यक्तिको हो । माइक्रोचिप लगाइएका कुकुर बिरालोको मृत्यु भएमा, स्थानान्तरण गरेमा वा हराएमा मालिकले ७ दिनभित्र सम्बन्धित वडा कार्यालयमा जानकारी दिन समेत हामी आग्रह गर्न चाहन्छौँ ।
माइक्रो चिपले हराएका कुकुर वा बिरालोलाई मालिकसँग पुनर्मिलन गराउन महत्त्वपूर्ण भूमिका खेल्छ । यो सानो चिपले स्थायी पहिचान प्रदान गर्छ र हराएको पाल्तु जनावरलाई सहजै भेट्टाउनका लागि सहजीकरण गर्दछ ।
माइक्रोचिप लगाउने प्रक्रिया छिटो, सुरक्षित र किफायती छ । त्यसैले हामी ८ हप्ताभन्दा माथिका कुकुरमा माइक्रोचिप अनिवार्य रुपमा लगाउन आग्रह गर्न चाहन्छौ । साथै कुकुर बिरालो बेच्न वा अरूलाई दिनुअघि माइक्रोचिप अनिवार्य लगाउन अनुरोध गर्दछौँ ।
