चितवन । उपप्रधानमन्त्री एवम् शहरी विकास मन्त्री प्रकाशमान सिंहले शहरहरूमा सडक बनाउँदा ‘युटिलिटी’ करिडोरको अवधारणा अगाडि बढाउनुपर्ने जनाएका छन् ।
पूर्वपश्चिम राजमार्गको ६ लेनमा विस्तारित गोन्द्राङ- पुल्चोक सडक खण्डको समुद्घाटन समारोहलाई सम्बोधन गर्दै उपप्रधानमन्त्री एवम् शहरी विकासमन्त्री सिंहले युटिलिटी करिडोरको अवधारणाले विकास निर्माणको कामलाई राम्रो गर्ने जनाए ।
सडक बने लगत्तै ढल, खानेपानीको पाइप, फाइबर बिछ्याउनका लागि भत्काइहाल्ने प्रवृत्ति रोक्नका लागि पनि युटिलिटी करिडोरको अवधारणामा जानुपर्नेमा सिंहको जोड छ ।
खास कुरा शहरकाेबिचमा बाटो बनाउँदा युटिलिटी करिडोरको अवधारणालाई अब हामी हामीले अगाडि बढाउनुपर्छ । सडक बन्छ लगत्तै ढल, पाइपलाइन,फाइबर बिछ्याउन भत्काइन्छ , ´ उनले भने, जसले गर्दा जनतामा बाटो बने पनि भत्किहाल्छ भन्ने परेको छ । यसलाई रोक्न युटिलिटी करिडोरमा अब ध्यान दिनै पर्छ । ´
त्यस्तै उपप्रधानमन्त्री सिंहले अहिले सरकारले पूर्वाधार निर्माणमा जाेड दिइरहेको बताए । व्यवस्था बदलियो अवस्था बदलिएन भन्ने भाष्य बनाउन अहिले खोजिएको भन्दै उनले व्यवस्थासँगै जनताको अवस्थामा पनि परिवर्तन आएको दाबी गरे ।
`राम्रो काम होस् भन्ने जनताको चाहना छ । त्यसका लागि समय लाग्छ । धेरै कुरा गर्नुभन्दा काम गरेरै देखाउनु छ । डेलिभरी हुनुपर्यो भन्ने आम जनताको चाहना छ । डेलिभरी बिस्तारै हुँदै छ,´ उनले भने ।
त्यस्तै उनले संघीयताको भावना संघ, प्रदेश र स्थानीय सरकार मिलेर नै विकास निर्माणको काम गर्ने रहेको बताए । जनताले चाहेको आयोजना तीन तहको सरकारको संयोजनमा अघि बढाउँदा सफल हुने रहेछ भन्ने उदाहरण पूर्वपश्चिम राजमार्गको ६ लेनमा विस्तारित गाेन्द्राङ- पुल्चाेक सडक खण्ड बनेको पनि सिंहले प्रस्ट पारे ।
उनले सडक विस्तारसँगै गतिशीलता बढ्ने र त्यसले आर्थिक गतिविधि वृद्धिसँगै पूर्वाधार निर्माण सहज बनाउने जनाए ।
