सुर्खेत । मध्यपश्चिम विश्वविद्यालयको स्वतन्त्र विद्यार्थी युनियन (स्ववियु) चुनावमा नेपाल विद्यार्थी संघ (नेविसंघ)को प्यानलनै विजयी भएको छ । विवेक खड्का नेतृत्वको प्यानलले जित हाँसिल गरेको हो ।
चुनावमा अध्यक्ष पदका लागि भएको प्रतिस्पर्धामा खड्काले १ हजार १८८ मत प्राप्त गर्दै अनेरास्ववियुका जगतजंग शाहीलाई पराजित गरे । शाहीले ९०७ मत प्राप्त गरेका थिए । अध्यक्षका अन्य प्रत्याशी प्रकाश विकले २७५ मत र मिलन बिसीले २३१ मत पाए । कुल ४ हजार ३८३ मतदातामध्ये २ हजार ८६४ जनाले मतदान गरेका थिए । यो परिणामले मध्यपश्चिम विश्वविद्यालयमा नेविसंघको पकड अझै बलियो रहेको देखाएको छ ।
विशेष गरी हालैका राजनीतिक घटनाक्रमका कारण विद्यार्थी राजनीतिमा असन्तुष्टि बढिरहेको बेला यो जित नेविसंघका लागि महत्त्वपूर्ण मानिएको छ ।
सचिवमा नेविसंघकै भूपेन्द्र आचार्यले एक हजार ४ सय ९६ भोट र कोषाध्यक्षमा नेविसंघकै उम्मेदवार लोक प्रसाद रिजाल १ हजार २ सय ५५ भोट सहित निर्वाचित भएका छन् । यस्तै अन्य सदस्यहरुमा पनि नेविसंघकै उम्मेदवारहरु विजयी भएका छन् ।
