काठमाडाैं । नेपाल विद्युत प्राधिकरणका नवनियुक्त कार्यकारी निर्देशक हितेन्द्रदेव शाक्यलाई राजनीतिक लाभ भएको छ। भारतले साँझ र राति विद्युत दिन बन्द गरेको, उद्योगमा १२ घन्टा लोडसेडिङ भइरहेको र आगामी दिनमा उपभोक्ताको घरमा पनि लोडसेडिङ हुने लगभग पक्का भएका बेला हितेन्द्र प्राधिकरणमा आएका थिए।
सरकारले कुलमान घिसिङलाई बर्खास्त गरेर गत सोमबार मात्र हितेन्द्रलाई नियुक्त गरेपछि एकथरीको तर्क थियो, अब लोडसेडिङ कन्फम। भारतले राति विजुली नदिने र नेपालको उत्पादनले नधान्ने भएपछि लोडसेडिङ हुँदा त्यसको अपजस हितेन्द्रलाई मात्र होइन प्रधानमन्त्री केपी शर्मा ओली र ऊर्जामन्त्री दीपक खड्कालाई जाने पक्का थियो।
किनकी घिसिङलाई हटाउदा सरकारको तीव्र आलोचना भइरहेका बेला भारतबाट खुसीको खबर आएको हो। यो खबरका कारण त्यो समूहलाई झड्का लागेको छ, जसले सुनियोजित रुपमा व्यवस्था र राज्यमाथि आक्रमण गर्दै आएको छ। मुलुकमा अस्थिरता भएको देख्न चाहन्छ।
इण्डियन इनर्जी एक्सजेञ्जबाट थप ६ सय मेगावाट विद्युत दिने स्वीकृति भएको हो। ऊर्जामन्त्री खड्का र परराष्ट्रमन्त्री डा आरजु राणाको कुटनीतिक पहलमा भारतले थप ५ घण्टा विद्युत दिने सहमति जनाएको हो। यो विद्युत आएमा उपभोक्तामा लोडसेडिङको जोखिम हट्ने छ नै १२ घन्टा लोडसेडिङको मार खेपिरहेका उद्योगलाई पनि राहत हुने भएको छ।
ऊर्जा मन्त्रालयका सचिव सुरेश आचार्यले सोलार आवरबाहेक राति ११ बजेदेखि ४ बजेसम्म अब आवश्यक ६ सय मेगावाट बिजुली पठाउने सहमति भारतले गरेको छ। अप्रिल १ देखि उक्त बिजुली आउन सुरु हुनेछ।
राति पिकिङ प्लान्टमा पानी जम्मा गरेर पिक आवरमा पिकिङ प्लान्टको बिजुली निकालेर उद्योग र घरमा लोडसेडिङ हुन नदिने तयारी प्राधिकरणको छ।
उक्त विद्युत ढल्केवर-मुजफ्फरपुर प्रसारण लाइनबाट नेपालमा आउने भएको छ। हाल भारतले जुन ३० सम्मका लागि इण्डियन इनर्जी एक्सचेञ्जबाट सोलार आवरमा १ हजार ४ मेगावाट विद्युत विद्युत उपलब्ध गराउँदै आएको थियो।
