लस क्रुसेस । संयुक्त राज्य अमेरिकाको एक राज्य न्यु मेक्सिकोमा राति गोली चल्दा तीनजनाको मृत्यु भएको छ । १५ जना घाइते छन् ।
स्थानीय समयानुसार राति १० बजेतिर भएको सशस्त्र आक्रमणमा दुई १९ वर्षीय र एक १६ वर्षीय किशोरको मृत्यु भएको लस क्रुसेस प्रहरीले जनाएको छ । पीडितको पहिचान अज्ञात छ ।
प्रहरीका अनुसार, घाइते व्यक्तिहरू १६ देखि ३६ वर्ष उमेरका छन् ।
आक्रमणका विषयमा हालसम्म कसैलाई पक्राउ गरिएको छैन । तर, प्रहरीले सक्रिय रूपमा धेरै सुराग खोजिरहेको छ । लस क्रुसेसका प्रहरी प्रमुख जेरेमी स्टोरीले एक पत्रकार सम्मेलनमा यङ पार्कमा एउटा ‘अवैध कार शो’मा दुई समूहबीचको झगडा गोलीबारीमा परिणत भएको बताए । घटनास्थलबाट प्रहरीले पेस्तोल बरामद गरेको उनले जानकारी दिए ।
लस क्रुसेस फायर चिफ माइकल डेनियलले एक पत्रकार सम्मेलनमा सात घाइतेलाई स्थानीय अस्पतालबाट थप उपचारका निम्ति एल पासो लगिएको बताए । चार घाइते उपचारपश्चात् ‘डिस्चार्ज’ भइसकेका छन् । अरू चारजनाको अवस्था अज्ञात रहेको उनले उल्लेख गरे ।
“यो हाम्रो समुदायका निम्ति दुःखद दिन हो । म समुदायलाई एकसाथ भेला हुन, बलियो र एकताबद्ध भएर उभिन र हाम्रो सहरमा भएको यो दुःखद घटनाको सामना गर्न आग्रह गर्न चाहन्छु,” उनले भने ।
लस क्रुसेस अमेरिका–मेक्सिको सीमाबाट लगभग ४१ माइल उत्तरमा चिहुआहुआन मरुभूमिको किनारमा अवस्थित छ । एएनआई
