काठमाडौं । राप्रपाका प्रवक्ता ज्ञानेन्द्र शाहीले देशमा प्रत्यक्ष निर्वाचित कार्यकारी प्रधानमन्त्री र राष्ट्रपतिको ठाउँमा राजा रहने व्यवस्था आफुहरुको माग भएको जनाएका छन् । ‘हामीले जनताबाट प्रत्यक्ष निर्वाचित कार्यकारी प्रधानमन्त्री चाहिन्छ भनिरहेका छौँ । कार्यकारी प्रधानमन्त्री रहने अहिले राष्ट्रपतिको ठाउँमा राजा रहने, यसले देशको राष्ट्रिय एकतालाई संसारभर मुलुकको इज्जत र प्रतिष्ठालाई जोगाइराख्न राजसंस्थाबाहेक अरू कसैले सक्दैन ।’ उनले भने ।
बिहीबार काठमाडौंमा पत्रकार सम्मेलन गर्दै शाहीले पूर्वराजा ज्ञानेन्द्र शाह पोखराबाट काठमाडौं फर्किँदा फागुन २५ गते त्रिभुवन विमानस्थलमा सबैलाई भेला हुन आह्वान समेत गरेका छन् ।
उनले आज राष्ट्रपतिको कहीँ कतै सम्मान नभएको जनाए । उनले इज्जत भनेको के हो ? पूर्वराजाको भुटान भ्रमण हेर्न आग्रह गरे । उनले केपी ओलीलाई झापाका जनताले सांसद मात्रै बनाएको भन्दै जुम्ला, डडेलधुराका जनताले प्रधानमन्त्रीको रूपमा भोट नहालेको जनाए ।
उनले १६४ निर्वाचन क्षेत्रको जनताले ओलीलाई प्रधानमन्त्रीको रूपमा भोट नहालेको भन्दै प्रत्यक्ष निर्वाचित प्रधानमन्त्री हुनुपर्ने बताए । उनले प्रदेशलाई खारेज गर्नुपर्ने समेत जनाए ।
