काठमाडौं । अमेरिकाको टेक्सास राज्यबाट डिपोर्ट भएका ९ जना नेपाली काठमाडौं आइपुगेका छन् ।
उनीहरूमध्येका ८ जनालाई अमेरिकन प्रहरीले चार्टड उडानमार्फत त्रिभुवन अन्तर्राष्ट्रिय विमानस्थलमा ल्याएर छाडेका हुन् । उनीहरूलाई छाड्न ४ जना अमेरिकी प्रहरी आएका थिए । अमेरिकन प्रशासनले उनीहरूलाई हातमा हत्कडी र खुट्टामा चेन लगाएर ल्याएको त्रिभुवन विमानस्थल अध्यागमन कार्यालयका अधिकृतहरू जनाउँछन् । एकजना अधिकृतले रातोपाटीसँग भने, ‘हत्कडी र चेन खोलेर अमेरिकन प्रहरीले यहाँ जिम्मा लगाएर फर्केका छन् ।
डिपोर्ट (निष्कासन) भएकाहरूले पनि आफूहरूलाई जहाजमा समेत हत्कडी र चेन लगाएको जनाएका छन् । डिपोर्ट हुनेमध्ये एकजना महिलाचाहिँ व्यावसायिक उडान मार्फत काठमाडौं आइपुगेकी छन् । डोटी घर भएर अमेरिका गएकी बिनिता व्यावसायिक उडानमार्फत काठमाडौं आएकी हुन् । काठमाडौं आएपछि अध्यागमन अधिकृतहरुसँग उनले भनेकी छन्, ‘डिपोर्टको निर्णय भएपछि म स्वदेश फर्किन राजी भएको हुनाले मलाई चार्टर्ड विमानमा पठाइएन ।’ उनी टेक्ससबाट कतारको दोहा हुँदै काठमाडौं आएकी हुन् ।
चार्टर्ड विमानबाट फर्काइएका ८ जनालाई चाहिँ टेक्ससबाट न्यूयोर्क र अल्वानिया ट्रान्जिट हुँदै नेपाल ल्याइएको हो । नेपाली सवार चार्टर्ड विमान इन्धन भर्न अल्वानियमा १ घण्टा रोकिएको डिपोर्ट भएकाहरूले बताएका छन् ।
यो पनिअमेरिकाबाट डिपोर्ट भएकाहरुले नेपाल प्रहरीलाई दिए यस्तो बयानअमेरिकाबाट डिपोर्ट हुनेमा २२ वर्षीय युवक र एक महिलासहित ८ जना रहेको पुष्टिअमेरिकाबाट डिपोर्ट भएका ८ नेपालीलाई अध्यागमनले लगायो प्रहरीको जिम्मानिष्कासित नेपालीलाई लिएर अमेरिकी चार्टर जहाज काठमाडौं अवतरण (तस्बिरहरू)
डिपोर्ट हुनेहरूमा दाङका ३ जना, रुकुम पूर्वका २ जना, रुकुम पश्चिमका २ जना, रोल्पाका १ जना र डोटीका १ जना छन् । विमानस्थल अध्यागमनमा कार्यरत एकजना अधिकृतका अनुसार सुस्मा, लक्ष्मण, सुकुमार, हिमाल, मोहन, टोप , कमल र दीपक डिपोर्ट भएका हुन् ।
उनीहरू लाखौँ खर्चेर अमेरिका पुगेका थिए । तर, सिमानाको पर्खाल कटेको केही बेरमा नै पक्राउ परेर हिरासतमा पुगेको खुलेको छ । बुधबार फर्काइएकाहरू अमेरिकामा लामो समयदेखि डिटेन्सन ‘अफिसियल कस्टडी’मा रहेको मानव बेचबिखन ब्यूरोका एसपी नरेन्द्र कुँवरले जनाए । फर्काएकाहरूलाई बबरमहल स्थित ब्यूरोको कार्यालयमा ल्याएर अनुसन्धान अधिकृतहरूले सोधपुछ गरिरहेका छन् । उनीहरू त्यहाँ ५ देखि ९ महिनासम्म डिटेन्समा बसेको एसपी कुवरले जानकारी दिए । उनले भने, ‘मानव बेचबिखन विरुद्धको कानुन अनुसार उहाँहरू पीडित भए नभएको बारेमा सोधपुछ र परामर्श गरिरहेका छौँ ।’
काठमाडौंबाट दुबई हुँदै युरोप पुगेका उनीहरू ब्राजिल पुगेर मेक्सिको पुगेका थिए । उनीहरू मेक्सिकोबाट सिमानाका पार गरेर अमेरिका पुगेको कुँवरले जनाए । उनले भने, ‘त्यहाँसम्म पुग्दा लाखौँ खर्च गरेको देखिन्छ ।’
कुँवरका अनुसार उनीहरूले प्रतिव्यक्ति ५० लाखदेखि १ करोडसम्म खर्च गरेका छन् । उनी भन्छन्, ‘कसैले ४० लाख, कसैले ६५ लाख पनि खर्च गरेको देखिन्छ ।’
ब्राजिलमा पुगेपछि बिचौलियाले भनेअनुसार उनीहरूले पासपोर्ट फ्याँकिदिए । त्यहाँबाट कोही विमानमा र केही सड्क मार्ग हुँदै मेक्सिको पुगेका थिए । अनुसन्धानमा संलग्न एकजना अधिकृत भन्छन्, ‘ब्राजिलबाट शरणार्थी बनेर उनीहरू अमेरिका प्रवेश गरेको देखिन्छ ।’ फर्किनेहरू अधिकांश २० देखी ३५ वर्ष उमेर समूहका छन् । अमेरिकाको राष्ट्रपतिमा डोनाल्ड ट्रम्प निर्वाचित भएसँगै उनले अवैध आप्रवासीहरूप्रति कडा नीति लिए । ठिक त्यसैबेला डिटेन्सनमा रहेका नेपालीलाई त्यहाँको अदालतले ‘डिपोर्ट’ गर्ने आदेश गरेको प्रहरी अधिकृतहरू जनाउँछन् ।
भन्छन्, ‘कसैविरुद्ध उजुर गर्दैनौँ’
अमेरिकाबाट फर्काएकाहरूसँग ब्यूरोका अनुसन्धान अधिकृतहरूले त्यहाँ पठाउने समूहबारे सोधपुछ गरेका छन् । तर, उनीहरूले बिचौलियाबारे जनाउन अस्वीकार गरेका छन् । उनीहरूले भनेका छन्, ‘कसैविरुद्ध पनि उजुर गर्दैनौँ ।’
केही दिनअघि अमेरिका हिँडेका युवक ११ महिनामा बिचबाटै फर्किएका थिए । ११ महिनामा उनी नाइजेरिया पुगेर फर्किएका हुन् ।
