एजेन्सी । अष्ट्रेलिया क्रिकेटको एकदिवसीय टोलीका कप्तान स्टिभ स्मिथले एकदिवसीय क्रिकेटबाट सन्यास लिएका छन्। च्याम्पियन्स ट्रफीको सेमिफाइनलमा भारतसँग पराजित भएपछि स्मिथले सन्यासको घोषणा गरेका हुन्।
क्रिकेट अष्ट्रेलियाले यसबारे बुधबार जानकारी गराएको हो। मंगलबार अष्ट्रेलियाली टोली भारतसँग चार विकेटले पराजित भएको थियो। प्याट कमिन्सको अनुपस्थितिमा स्मिथले टोलीको कप्तानी गरिरहेका थिए। उनी टेस्ट खेललाई भने जारी राख्नेछन्।
३५ वर्षीय स्मिथले भारतसँगको हारपछि आफ्ना सहकर्मीहरूलाई आफूले आफ्नो अन्तिम एकदिवसीय खेल खेलेको बताएका थिए। स्मिथले भने, ‘यो एउटा अद्भुत यात्रा भएको छ र मैले यसको हरेक क्षणको आनन्द लिएको छु। धेरै राम्रा क्षणहरू र राम्रा सम्झनाहरू थिए। दुई विश्वकप जित्नु एउटा उत्कृष्ट उपलब्धि थियो।
अहिले मानिसहरूका लागि २०२७ को विश्वकपको तयारी सुरू गर्ने ठूलो अवसर हो, त्यसैले यो सन्यास लिने सही समय जस्तो लाग्यो।’ २०१० मा वेस्ट इन्डिजविरुद्ध अस्ट्रेलियाको लागि डेब्यू गरेका स्मिथले कुल १७० एकदिवसीय खेलमा ५८०० रन बनाएका छन्। यस अवधिमा उनको औसत ४३.२८ र स्ट्राइक रेट ८६.९६ थियो। एकदिवसीयमा उनको उत्कृष्ट पारी १६४ रन हो। उनले एकदिवसीय खेलमा ३५ अर्धशतक र १२ शतक बनाएका छन्। २०२५ को च्याम्पियन्स ट्रफीमा स्मिथ फर्ममा थिएनन्। उनले तीन इनिङमा ४८.५० को औसतमा ९७ रन बनाए। उनको उत्कृष्ट इनिङ ७३ रन थियो।
