काठमाडौं । नेकपा (माओवादी केन्द्र) का अध्यक्ष पुष्पकमल दाहालले आफूलाई प्रधानमन्त्रीबाट कांग्रेस-एमालेले नभई बिचौलियाहरूले हटाएको टिप्पणी गरेका छन्।
शुक्रबार दोलखाको जिरीमा आयोजित कार्यक्रमलाई सम्बोधन गर्दै उनले यस्तो बताएका हुन्।
‘तपाईंहरूलाई लागेको होला कि प्रचण्डलाई माओवादीको सङ्ख्या कम भएर कांग्रेस एमालेले हटाए भनेर। तर, मलाई हटाउन कांग्रेस र एमालेका नेताहरूले भन्दा पनि भूमाफिया, बिचौलिया, दलालहरूले हटाएका हुन्। मैले गरेको कामको कारण आफ्नो भविष्य अँध्यारो देखेपछि कांग्रेस-एमालेका नेताहरूलाई आफ्नो घर, होटल बोलाएर प्रचण्डलाई हटाइएन भने तपाईंहरू पनि र हामी पनि सकियौँ भनेर भनेपनि मलाई हटाइयो,’ उनले भने।
अगाडि उनले भने, ‘मैले गरेको काम दलाल पुँजीपतिहरूलाई मन परेन। मैले गरेको काम भ्रष्टाचारहरूलाई मन परेन। प्रचण्ड नेतृत्वमा रहिरह्यो भने हाम्रो दिन सकियो भनेर भ्रष्टाचारीहरू डराए। भूमाफियाहरूलाई मन परेन। सुशासन, सामाजिक न्याय, आर्थिक समृद्धिका कामहरूलाई मन परेन। सेटिङमा काम गर्ने एक/दुई दर्जन मान्छे छन् र बिना मेहनत करोडौँ लुट्छन्। उनीहरूले मेरो नेतृत्वको सरकार ढाले।’
