काठमाडौं । अस्ट्रेलियाले श्रीलंकाविरुद्धको दोस्रो टेस्ट ९ विकेटले जितेको छ। अस्ट्रेलिया यो जितसँगै सिरिज २-० ले जित्न सफल भयो। यसअघि अस्ट्रेलियाले पहिलो टेस्ट इनिङ्स अन्तरले जितेको थियो।
अस्ट्रेलिया टिमले १३ वर्षपछि श्रीलंकामा टेस्ट सिरिज जितेको हो। यसअघि अस्ट्रेलियाले श्रीलंकामा २०११ मा जित हासिल गरेको थियो। त्यसपछि श्रीलंकामा भएका २ सिरिजमा एक खेल श्रीलंकाले जितेको थियो भने अर्को एउटा बराबरी भएको थियो।
अब यी दुई टिमबीच दुई खेलको एकदिवसीय श्रृंखला हुनेछ। श्रृंखलाको पहिलो खेल १२ फेब्रुअरीमा कोलम्बोमा हुनेछ।
दोस्रो टेस्टमा टस जितेर पहिले ब्याटिङ गरेको घरेलु टोली श्रीलंकाले पहिलो इनिङ्समा २ सय ५७ रन बनाउँदा कुशल मेन्डिसले अविजित ८५ रन र दिनेश चन्डिमलले ७४ रन बनाएका थिए।
जवाफमा अस्ट्रेलियाले पहिलो इनिङ्समा स्टिभ स्मिथ र एलेक्स क्यारीको शतकीय योगदानमा ४ सय १४ रन बनायो। कप्तान स्मिथले १ सय ३१ रन बनाउँदा क्यारीले १ सय ५६ रन बनाएका थिए।
पहिलो इनिङ्समा १ सय ५७ रनको अग्रता बनाएको अस्ट्रेलियाविरुद्ध जवाफी इनिङ्स सुरु गरेको श्रीलंका दोस्रो इनिङ्समा २ सय ३१ रनमा अलआउट भयो। उसका लागि एन्जेलो म्याथ्युजले ७६ रन तथा कुशल मेन्डिसले ५० रनको इनिङ्स खेल्नुबाहेक अन्य खेलाडीको प्रदर्शन गतिलो रहेन।
समग्रमा दोस्रो इनिङ्समा ७५ रनको लक्ष्य पाएको अस्ट्रेलियाले उक्त लक्ष्य १ विकेट गुमाएर पूरा गर्दै सिरिज क्लिन स्विप गर्यो। अस्ट्रेलियाका लागि उस्मान ख्वाजा २७ र मार्नुस लबुसेन २६ रनमा अविजित रहँदा ट्रेभिस हेड २० रनमा आउट भए।
