काठमाडौं । लामो समयदेखि पूर्वउपराष्ट्रपति नन्दबहादुर पुन ‘पासाङ’लाई पार्टीमा जिम्मेवारी दिने चर्चा चले पनि नेकपा माओवादी केन्द्रले अझै यस विषयमा निर्णय गर्न सकेको छैन । सोमबार बसेको पार्टीको पदाधिकारी बैठकले पनि यसबारे कुनै निर्णय गरेन ।
बैठकमा पासाङले आफूलाई पार्टीमा ‘कृषि तथा उत्पादन विभाग’को जिम्मेवारी दिन प्रस्ताव गरेका थिए । उनको प्रस्तावबारे नेताहरू सकारात्मक रहेको जनाइएको छ ।
उपमहासचिव शक्ति बस्नेतले पासाङलाई उपाध्यक्ष वा अन्य जिम्मेवारी दिने विषयमा छलफल भएको तर निर्णय नभएको जनाए । यद्यपि पासाङलाई यस विषयमा सबै पदाधिकारी सकारात्मक नै रहेको बस्नेतले दाबी गरे ।
‘पासाङजीलाई उपाध्यक्ष बनाउन वा कुनै जिम्मेवारी दिने विषयमा सबै पदाधिकारी सकारात्मक छन् । यसबारे बैठकमा छलफल पनि भयो तर निर्णय भएको छैन । अर्को बैठकले निर्णय गर्ला,’ उनले भने ।
राज्यको सम्मानित पदमा पुगेको व्यक्ति फेरी पार्टीको सक्रिय राजनीतिमा आउने चर्चाले बाहिर राम्रो सन्देश नभएको भन्दै केन्द्रीय समिति बैठकमा नेताहरूले तीव्र आलोचना गरेका थिए । तीव्र आलोचना भएपछि अध्यक्ष प्रचण्डले पासाङलाई आफूले बोलाएको नभई उनी आफै आएको जिकिर गरेका थिए ।
