काठमाडौं । गृहमन्त्री रमेश लेखकले ताप्लेजुङको पाथीभरा (मुक्कुमलुङ) मा केबलकार निर्माण विरोध गर्दै पहिचानवादी समूहले गरेको आन्दोलनमा भएको प्रहरी दमनबारे औपचारिक विज्ञप्ति सार्वजनिक गरेका छन् ।
मङ्गलबार साँझ एक विज्ञप्ति जारी गर्दै गृह मन्त्रालयले पाथीभरा घटनामा २१ जना प्रहरी र तीन सर्वसाधारण घाइते भएको जनाएको छ । सबै घाइतेहरूको उपचार सरकारले गर्ने प्रबन्ध मिलाइएको पनि मन्त्रालयले विज्ञप्तिमा उल्लेख गरेको छ ।
मन्त्रालयले केबलकार निर्माणबारे भएको विवादका विषयलाई शान्तिपूर्ण ढङ्गले निष्कर्षमा पुर्याउन पनि आग्रह गरेको छ ।
शनिबार सुरक्षाकर्मीसँग पाथीभरामा ‘नो केबलकार समूह’को झडप हुँदा २४ जनाभन्दा धेरै घाइते भएका थिए । सुरक्षाकर्मीतिर २० जना र प्रदर्शनकारीतिर ४ जना घाइते भएका थिए । प्रदर्शनकारीमध्ये दुई जनालाई गोली लागेको छ भने एकजनाको कुमको हड्डी भाँचिएको छ ।
