एजेन्सी । पछिल्ला केही वर्षयता ब्रेन कम्प्युटर इन्टरफेस (BCI) प्रविधि धेरै काम भइरहेको छ । यसैक्रममा अमेरिकाको लस भेगासमा यही जनवरी ७ देखि १० सम्म भएको कन्जुमर इलेक्ट्रोनिक्स शो (CES 2025) मा आधारित एक ग्याजेट सार्वजनिक गरिएको छ । यो उपकरणले मानिसको मस्तिष्कलाई पढ्नसक्ने दाबी गरिएको छ । अर्थात् तपाई हामीले के सोँचिरहेका छौँ ? भन्ने कुरालाई यस यन्त्रणले डिकोड गरिदिन सक्दछ ।
अमेरिकी स्टार्टअप Based Hardware ले Omi नामक उक्त एआई उपकरण बनाएको हो । उक्त सानो डिभाइसलाई नेकलेसको रुपमा गलामा लगाउन सकिन्छ । Hey Omi भनेर यसलाई सक्रिय बनाउन सकिन्छ । तर Listening mode मा भने यस्तो जगाउने शव्दको आवश्यकता पर्नेछैन ।
वास्तवमा यो बिसिआईमा आधारित उपकरण भन्दा पनि एआई टूल जस्तो लाग्दछ । किनकि यसले Rabbit R1 तथा Humane Pin ले जस्तै काम गर्दछ । यसमा GPT4o राखिएको छ र यसले प्रयोगकर्तालाई पर्सनलाइज्ड सुझाव दिन सक्छ।
यसले रियल टाइममा भाषा अनुवाद पनि गर्न सक्दछ । अर्थात् तपाईको नजिक कोही व्यक्तिहरु अन्य भाषामा कुराकानी गरिरहेका छन् भनेपनि तपाईलाई कुनै समस्या पर्नेछैन । किनकि यसले उक्त बोलीचालीलाई तपाईको भाषामा अनुवाद गरिदिनेछ।
गोपनियताका लागि खतरा
तर ओमी वास्तवमा आम मानिसहरुको प्राइभेसीका लागि भने एउटा खतराको रुपमा रहनेछ । यो सधै listening mode मा रहने हुनाले यसले तपाईको कुराकानी सुनिरहेको हुन्छ ।
यस्तोमा आफू तथा आफ्नो आसपासका अन्य मानिसहरुका बोलीचाली तथा गतिविधिहरुका डेटा एकत्रित हुने र कुनैपनि बेला दुरुपयोग हुनसक्ने जोखिम रहन्छ । तर निर्माता कम्पनीले प्रयोगकर्ताका डेटा बाहिर नलगिने र उपकरणमै स्टोर हुने भन्दै आफ्ना डेटा कहाँ गइरहेका छन् भन्ने कुरा पनि देख्न सकिने प्रष्ट पारेको छ । त्यसैले नै यसलाई ओपन सोर्स पनि राखिएको छ ।
मानिसको दिमाग पढ्ने दाबी गरिएको Omi को मूल्य चाहिं जम्मा ८९ अमेरिकी डलर अर्थात् करिब १२ हजार नेपाली रुपैयाँ रहेको छ ।
यद्यपि यो डिभाइसको ब्रेन कम्प्युटर इन्टरफेसको पहुँच भने पछि प्राप्त हुने बताइएको छ। हालका लागि यो Audio Only AI डिभाइस हो । यो वर्ष सन् २०२५ को दोश्रो त्रैमासिकमा यसलाई विश्व बजारमा पठाउने योजना कम्पनीको छ ।
कम्पनीका अनुसार ओमीले भविष्यमा मस्तिष्कका तरंग पढ्न सक्नेछ र मानिसले सोँचेको कुरालाई अनुवाद गर्न सक्नेछ । हालका लागि यो फिचर उपलब्ध नभएपनि निकट भविष्यमा यसलाई एक्टिभेट गर्न सकिने बताइएको छ ।
ओमीको आफ्नै एप स्टोरमा साढे २ सय भन्दा धेरै एप हुनेछन् । यी वास्तवमा प्लगइन्स हुन् ।
यदि भविष्यमा ब्रेन कम्प्युटर इन्टरफेस फिचरलाई सक्रिय बनाउनमा कम्पनी सफल भयो भने शायद यो गेम चेन्जिंग डिभाइस बन्न सक्दछ । तर केवल एआई डिभाइसको रुपमा यसलाई प्रयोग गर्नुको चाहीँ कुनैपनि तुक रहनेछैन । बजारमा अहिले नै धेरै खालका एआई डिभाइस छन्, जसको खासै प्रयोग पनि छैन । किनकि स्मार्टफोनमै अहिले एआईसँग सम्बन्धित विभिन्न फिचर उपलब्ध छन् ।
