विराटनगर । कोशी प्रदेशको स्वास्थ्य मन्त्रालयले निःशुल्क उपचार पाउने बिरामीको विवरण संकलन गर्न थालेको छ। मन्त्रालयले सबै निजी अस्पताललाई पत्राचार गरेर विवरण माग गरेको हो।
मन्त्रालयका अनुसार विपन्न, असहाय, बेवारिसे बिरामीको विवरण, अभिलेख तथा प्रतिवेदन पेस गर्न निजी अस्पतालहरूलाई आग्रह गरिएको छ। मन्त्रालयका जनस्वास्थ्य प्रशासक सागर प्रसाईंले सबै निजी अस्पताललाई बिहीबार पत्राचार गर्दै निःशुल्क उपचार पाएका बिरामीको विवरणसहितको प्रतिवेदन पेस गर्न अनुरोध गरेका छन्।
साथै, निःशुल्क तथा आंशिक सेवा लिएका व्यक्तिहरूको विवरण देखिने गरी सार्वजनिक हिसाबले टाँस्नुपर्ने व्यवस्थासमेत छ। उल्लेखित व्यवस्था बमोजिमको कार्य नगरेको र नगराएको अवस्थामा स्वास्थ्य संस्था स्थापना सञ्चालन तथा स्तरोन्नति मापदण्ड सम्बन्धी निर्देशिका २०७० को परिच्छेद ११ मा सञ्चालन अनुमति नवीकरण हुन नसक्ने र खारेज हुने सम्बन्धी व्यवस्था छ।
