काठमाडौं । नेकपा (माओवादी केन्द्र)ले नुवाकोटको ‘शेरा दरबार’ जग्गा प्रकरणमा आफ्नो पार्टीको कुनै संलग्नता नरहेको प्रष्टीकरण दिएको छ।
माओवादी केन्द्रका उपाध्यक्ष अग्नि सापकोटाले सोमबार सामाजिक सञ्जालमार्फत शेरा दरबारको जग्गा प्रकरणमा आफ्नो पार्टीको संलग्नता नरहेको दाबी गरेका हुन्।
उक्त प्रकरणमा पार्टी अध्यक्ष पुष्पकमल दाहालको नाम जोडेर गरिएको प्रचारमा कुनै आधार नरहेको उनको भनाइ छ।
उनले सामाजिक सञ्जालमा लेखेका छन्,’केही सञ्चारमाध्यममा प्रकाशित नुवाकोटको ‘शेरा दरबार’ जग्गा प्रकरणमा हाम्रो पार्टी ने.क.पा.(माओवादी केन्द्र)का अध्यक्ष कमरेड प्रचण्डको नाम जोडेर भैरहेको प्रचारबाजीप्रति हाम्रो गम्भीर ध्यानाकर्षण भएको छ। यस प्रकरणमा पार्टी अध्यक्षलाई जोडेर प्रचार गर्नुको कुनै आधार छैन।’
जग्गा प्रकरणमा जोडिएका मुख्य व्यक्ति विकेश श्रेष्ठ पार्टीको कुनै जिम्मेवारीमा नरहेको उनले बताएका छन्।
उनले भने,’जग्गा प्रकरणका मुख्य भनिएका व्यक्ति विकेश श्रेष्ठ पार्टीको कुनै जिम्मेवारीमा पनि छैनन् र पार्टीको कुनै गतिविधिमा पनि संलग्न छैनन्। प्रमाण र सत्यतथ्यका आधारमा हुने कानुनी कारबाहीमा हाम्रो असहमति नरहने कुरा स्पष्ट पार्न चाहन्छु।’
