पोखरा । पोखराको फेवातालमा दोस्रो संस्करणको ड्रागन बोटरेश फेस्टिबल सुरु भएको छ ।
लेकसाइडस्थित हल्लनचोकमा फेस्टिबल सुरु भएको हो । प्रतियोगिताको युवा तथा खेलकुद मन्त्री तेजुलाल चौधरीलेपोखराको पर्यटन प्रबर्द्धनमा मात्रै नभई नेपाली र चिनियाँ नागरिकबीच सुमधुर सम्बन्ध कायम गर्न सघाउने बताए ।
`खेलकुदले देश र समुदायलाई एकताको शुत्रमा बाँध्छ´, उनले भने । पोखरामा सन् २०२७ मा हुने १९ बर्षमुनिको महिला कृकेट प्रतियोगिता सन्चानार्थ आगामी आर्थिक बर्षको बजेटमा विशेष प्राथमिकता दिने मन्त्री चौधरीको उदघोष गरे ।
गण्डकी प्रदेश सरकार, पोखरा महानगरपालिका, नेपालस्थित चिनियाँ दूतावास र नेपाल पर्यटन बोर्डको संयुक्त आयोजना तथा नेपाल ड्रागन बोट एसोसिएसन, पोखरा पर्यटन परिषद् र पोखरा ओभरसिज चाइनिज एसोसिएसनको सहआयोजनामा फेस्टिभल भएको हो ।
आइतबार र सोमबार दुई दिन चल्ने प्रतियोगितामा २० समूहले सहभागिता जनाएका छन् । आयोजकका अनुसार नेपालका ११, चीन ८ र सिंगापुरका एक गरी २० समूह सहभागी हुने आयोजकले जनाएका हुन् ।
२०० मिटर र ५०० मिटर दुरीमा हुने प्रतिस्पर्धामा विजेता समूहले समान ५ हजार अमेरिकी डलर प्राप्त गर्नेछन् । उपविजेताले २ हजार डलर र तेस्रोले १ हजार २००डलर पुरस्कार प्राप्त गर्नेछन् ।
सहभागी १७ समूहलाई प्रतिसमूह ५ सय डलर प्रदान गरिने छ । ड्रागन बोटरेशमा सहभागी हुने चीनियाँ खेलाडी, प्राविधिक र पाहुनासहित १२९ जनालाई बोकेर सिचुवान एयरलाइन्सको विमानको चार्टर उडान मार्फत पोखरा आएको थियो ।
छेन्दुबाट सिचुवानको विमान पोखरा ओर्लिएको हो । चीनको प्रमुख चार परम्परागत पर्वमध्येको एक हो, ड्रागन बोटरेस फेस्टिभल। परम्परागत चिकित्सा र स्वास्थ्य उत्सवको रुपमा मनाइने ड्रागन बोटरेस फेस्टिभल पोखराको फेवातालमा गत वर्षको असार ८ र ९ गते भएको थियो ।
प्रतियोगिताका लागि चीनबाटै ड्रागन बोट ल्याएर पोखरा महनगरलाई हस्तान्तरण गरिएको हो ।
चीनसँगै मलेसिया, इन्डोनेसिया, सिंगापुर र ताइवानमा मनाइने यो फेस्टिभल त्यतिबेला दक्षिण एसियामै पहिलो पटक पोखरामा मनाइएको आयोजकको दाबी थियो ।
