काठमाडौं । नेपाल प्रिमियर लिग (एनपिएल)अन्तर्गत लिग चरणमा अन्तिम ‘डबल हेडर’ अर्थात् दिनको दुई खेलहरुमा काठमान्डु गुर्खाज र विराटनगर किंग्स तथा सुदूरपश्चिम रोयल्स र पोखरा एभेन्जर्स भिड्दै छन्।
प्रतियोगितामा पोखरा र विराटनगर आफ्नो अन्तिम खेल अगावै बाहिरिसकेकाले आजका लागि काठमान्डु र सुदूरपश्चिमका लागि यो खेल निर्णायक र महत्त्वपूर्ण हुनेछ।
सुदूरपश्चिम बाहेक बाँकी तीन टिमले लिग चरणमा आफ्नो अन्तिम खेल खेल्दै छन् । विराटनगर र पोखरा एभेन्जर्स प्लेअफ होडबाट बाहिरिसकेकाले उनीहरुका लागि यो खेल औपचारिक मात्र रहने छ। तर अन्य दुई टिमका लागि भने उतिकै महत्त्वपूर्ण छ।
आजको पहिलो खेलमा बिहान ९ बजे काठमान्डु गुर्खाज र विराटनगर किंग्सबीच प्रतिस्पर्धा हुँदैछ। काठमान्डु गुर्खाजका लागि प्लेअफ होड कायम राख्न आजको खेल फराकिलो अन्तरसहित जित्नु पर्ने चुनौती रहेको छ।
६ खेलबाट ६ अंक जोडेर पाँचौँ स्थानमा रहेको काठमान्डुले प्लेअफ पुग्न आफ्नो अन्तिम खेलमा फराकिलो जितसहित अन्य टिमको समेत अंक गणित मिल्नुपर्ने आवश्यक्ता छ। प्लेअफ होडमा रहेका चार टिममध्ये सबैभन्दा कठिन अवस्थामा छ काठमान्डु गुर्खाज। त्यसैले आज काठमान्डु फराकिलो जित एकमात्र विकल्प हो।
काठमान्डुको शीर्ष चारमा रहेर प्लेअफ पुग्नका लागि सबैभन्दा बलियो सम्भावना विराटनगरलाई ठूलो अन्तरमा हराउने र कर्णाली पनि अन्तिम खेलमा सुदूरपश्चिमसँग ठूलो अन्तरले हारेमा मात्र पुग्ने झिनो आशा छ। तर यो सबैको पहिलो लक्ष्य विराटनगर हो। त्यसैले काठमान्डुको भविष्य एक हदले विराटनगरको हातमा रहेको मान्न सकिन्छ।
