कञ्चनपुर । आफ्नै श्रीमती ३० वर्षीया ज्योती बिष्टको हत्या गरेको अभियोगमा भिमदत्त नगरपालिका-८ तिलाचौर बस्ने ४८ वर्षीय नरेन्द्र सिंह बिष्टलाई शनिबार राति प्रहरीले पक्राउ गरेको छ ।
नरेन्द्र सिंहले मादक पदार्थ सेवन गरी हँसिया प्रहार गर्दा ज्योतीको घटनास्थलमै मृत्यु भएको भन्ने खबर प्राप्त हुनासाथ प्रहरी चौकी जिमुवाबाट खटिएको प्रहरीले उनलाई पक्राउ गरेको हो । यस सम्बन्धमा प्रहरीले आवश्यक अनुसन्धान गरिरहेको छ ।
करिब २३ हजार ५ सय ट्याब्लेट नियन्त्रित लागूऔषध ट्रामाडोल बरामद सुनसरी, १६ मंसिर भोक्राहा नरसिंह गाउँपालिका-२ अकाहा बजारस्थित सडकबाट नियन्त्रित लागूऔषध ट्रामाडोल २३ हजार ५ सय ट्याब्लेट शनिबार राति प्रहरीले बरामद गरेको छ ।
प्रहरी चौकी भोक्राहाबाट खटिएको प्रहरीलाई देख्नासाथ चिरौलीबाट प्रकाशपुरतर्फ जाँदै गरेको प्र.१-०२-०४३ प ६८७१ नम्बरको मोटरसाइकलमा सवार २ जना अपरिचित व्यक्तिहरूले मोटरसाइकल र बोरा छोडी फरार भए पश्चात बोरा तलासी गर्दा प्रहरीले उक्त परिमाणको लागूऔषध फेला पारी बरामद गरेको हो ।
प्रहरीले मोटरसाइकलमा सवार हाल फरार व्यक्तिहरूको खोजी गर्नुका साथै यस सम्बन्धमा आवश्यक अनुसन्धान गरिरहेको छ ।
