काठमाडौं । सहकारी ठगीको अभियोगमा पक्राउ परेर जिल्ला प्रहरी कार्यालय कास्कीको हिरासतमा रहेका राष्ट्रिय स्वतन्त्र पार्टी (रास्वपा)का सभापति रवि लामिछानेलाई काठमाडौं ल्याउन जहाजको टिकट नपाइएको जिल्ला प्रहरी कार्यालय कास्कीले जनाएको छ।
कास्की प्रहरी प्रवक्ता बसन्तकुमार शर्माका अनुसार लामिछानेलाई आज काठमाडौँ ल्याउने तयारी भए पनि जहाजको टिकट उपलब्ध हुन सकेको छैन।
पोखरामा बयान सकिएकाले लामिछानेलाई काठमाडौँ ल्याउन लागिएको प्रहरीको भनाइ छ। कास्की जिल्ला अदालतले आइतबार थप १५ दिन हिरासतमा राखेर अनुसन्धान गर्न अनुमति दिएपछि उनलाई काठमाडौँ ल्याउन लागिएको हो ।
काठमाडौँको स्वर्णलक्ष्मी सहकारीको बचतकर्ताको रकम हिनामिनाको विषयमा अनुसन्धान गर्न लामिछानेलाई काठमाडौँ ल्याउन लागिएको हो।
स्वर्णलक्ष्मीको बचत रकम हिनामिनाको विषयमा लामिछानेविरुद्ध काठमाडौँ जिल्ला अदालतले पक्राउ पुर्जी जारी गरेको थियो।
