काठमाडौँ / विवादास्पद निणर्यसँगै तीन जनाको नक्कली कागजपत्र बनाएर जापान लगेको कुरा बाहिरिएसँगै कोशी प्रदेशका आन्तरिक मामिला तथा कानून मन्त्री रहेका लिलाबल्लभ अधिकारीले राजीनामा दिएका छन् ।
कार्तिक १३ जापान उड्ने विषय उनकै मन्त्रालयलाई समेत जानकारीमा आएको थिएन । जापानको एक कार्यक्रमको निमन्त्रण पत्र मन्त्रालयका कर्मचारी देखाउँदै जापान जान सकिने बताएका मन्त्री अधिकारी अन्ततः आफ्नै मन्त्री पदबाट बाहिरिनु परेको हो ।
आन्तरिक मामिला मन्त्रालयका कानून उपसचिव विश्वदीप वेस्राका अनुसार सुरुमा मन्त्री अधिकारीलाई तिहारको अन्तिम समयमा विदेश भ्रमणमा नजान अनुरोध गरिएको थियो ।
बेस्राले भने, ‘मन्त्री अधिकारी काठमाडौंबाट फर्कनेमा विश्वस्त हुनुहुन्थ्यो । तर अन्तिम समयमा के भयो, काठमाडौंबाट एकाएक जापान पुग्नु भएको थियो । उहाँले जसले निमन्त्रणा गरेको थियो त्यसबारे मन्त्रालयलाई औपचारिक जानकारी भने थिएन । उहाँले विदा सुरु भएको अवस्था सोचेर त्यसबारे गम्भीर हुनु भएन कि?’
कानून उपसचिव बेस्राका अनुसार अधिकारीसँगै कार्तिक १३ गते जापान पुगेका रसुवाका कञ्चन देवकोटा, खोटाङका जनक राईले बोकेको मन्त्रालयको परिचयपत्रसमेत नक्कली रहेको छ ।
अधिकारीसँगै जापान पुगेका तीनजनालाई जापानको अध्यागमनले डिपोट गरेको थियो । यसक्रममा उनीहरुलाई त्रिभुवन अन्तर्राष्ट्रिय विमानस्थलका सुरक्षाकर्मीले नियन्त्रणमा लिएर उपत्यका अपराध अनुसन्धान कार्यालयलाई जिम्मा लगाएको बताइएको छ । तर, सिआइबीका प्रवक्ता प्रहरी उपरीक्षक हबिन्द्र बोगटीले उक्त मुद्दा सिआइबीले नहेरेको र आफूलाई जानकारी नभएको देशसञ्चारलाई बताए।
डिपोट भएर फर्किएकाहरुको बयानसँगै नुवाकोटका जुगल रिजाल, दोलखाका बीरबहादुर र धादिङका महेश पाण्डेलाई पक्राउ गरिएको बताइएको छ । उनीहरुको कागजात पत्र रिजाल, बीरबहादुर र पाण्डेले बनाइदिएको खुलेको छ ।
तिहारको पूर्वसन्ध्यामा अधिकारीले मुख्यमन्त्री हिक्मतकुमार कार्कीलाई फोनमार्फत जानकारी गराएको बताइएको छ । तर, मुख्यमन्त्री कार्कीले प्रक्रिया नपुर्याइ नजान सुझाव दिएका थिए ।
घटना सार्वजनिक भइसकेपछि मन्त्री अधिकारीले बुधबार विहान मुख्यमन्त्री कार्कीलाई राजीनामा बुझाएका थिए । त्यसैगरी, उनले मन्त्रालयमा पत्रकार सम्मेलन राखेर आफूले नैतिकताका आधारमा राजीनामा दिएको बताएका थिए ।
