काठमाडाैं । भारतले ओलम्पिक खेलकुद प्रतियोगिता २०३६ को आयोजनाको दाबी पेश गरेको छ।
इन्डियन ओलम्पिक एसोसिएशन (आइओए)ले अन्तर्राष्ट्रिय ओलम्पिक काउन्सिल (आइओसी)लाई आधिकारी पत्र पठाउँदै ओलम्पिक आयोजनाको दाबी गरेको हो। केन्द्रीय खेलकुद मन्त्रीको भनाइलाई दाबी गर्दै दैनिक भास्करले भारतले औपचारिक रुपमा ओलम्पिक आयोजनाको दाबी पेश गरेको हो।
भारत सरकारको आधिकारिक पत्रमार्फत १ अक्टोबरमा आइओसीलाई ओलम्पिक आयोजनाका लागि पत्रचार गरिएको जनाइएको छ। यदि भारतले ओलम्पिक आयोजनाको जिम्मेवारी पाएमा ओलम्पिक आयोजना गर्ने भारत पहिलो दक्षिण एसियाली मुलुक हुनेछ। प्रधानमन्त्री नरेन्द्र मोदीले १५ अगस्टमा २०३६ को ओलम्पिक आयोजनाका लागि भारत सक्षम रहेको र त्यसका लागि तयार रहेको बताएका थिए।
ओलम्पिकको २०३२ सम्मको आयोजकको तय भइसकेको छ। ओलम्पिकको २०३२ को संस्करण अस्ट्रेलियाको ब्रिसबेन सहरले आयोजना गर्नेछ।
त्यसअघि २०२८ को ओलम्पिक भने अमेरिकाको लस ऐन्जलस शहरमा हुने तय भएको छ। भारतले यसअघि एशियन गेम र कमनवेल्थ खेलको आयोजना सफलतापूर्वक गरेकाले स्वभाविक रुपमा भारतले आयोजना गर्न सक्ने दाबी गरेको छ। देशले पछिल्लो पटक २०१० मा कमनवेल्थ खेलको आयोजना गरेको थियो। त्यसअघि भारतले १९८२ र १९५१ मा एसियन खेलको आयोजना गरेको थियो।
