काठमाडौं । बागमती प्रदेशमा चालू आर्थिक वर्षको साउनयता डेंगुबाट संक्रमित हुनेको संख्या साढे नौ हजार नाघेको छ । बागमती प्रदेश स्वास्थ्य मन्त्रालयले उपलब्ध गराएको तत्थ्यांकअनुसार साउनयता प्रदेशका १३ जिल्लामा डेंगुबाट नौ हजार ६३२ जना संक्रमित भएका छन् । यस्तै, दुईजनाको ज्यान गएको छ ।
मन्त्रालयका सूचना अधिकारी डा. रविन भुसालका अनुसार चालू आवको साउन महिनामा जम्मा ८७८ जना संक्रमित रहेको प्रदेशमा कात्तिकको पहिलो हप्तासम्म संक्रमितको संख्या बढेर साढे नौ हजार नाघेको हो । उनले साउन, भदौ, असोज र कात्तिकको पहिलो हप्तासम्म डेंगुबाट संक्रमित हुनेको संख्या प्रत्येक महिना झन्डै दोब्बरले बढेको जानकारी दिए।
मन्त्रालयको तथ्यांकअनुसार साउनमा ८७८ जना डेंगुका संक्रमित रहेकोमा भदौमा दुई हजार २२१, असोजमा पाँच हजार ४५८ र कात्तिकको पहिलो हप्तामै संक्रमितको संख्या एक हजार ७५ पुगेको छ । गत आव ०८०/८१ मा यही अवधिमा बागमती प्रदेशका १३ जिल्लामा डेंगुबाट संक्रमित हुनेको संख्या लगभग साढे आठ हजार थियो ।
प्रदेशको स्वास्थ्य मन्त्रालयको तत्थ्यांकअनुसार चालू आवको हालसम्म बागमती प्रदेशमा डेंगुबाट संक्रमित हुनेको संख्या सबैभन्दा बढी काठमाडौंमा रहेको छ । यहाँ अहिलेसम्म तीन हजार ८८ जना संक्रमित भएका छन् । यस्तै, काठमाडौंपछि चितवनमा दुई हजार ५८१, मकवानपुरमा एक हजार ३०४, ललितपुरमा ९६६ जना संक्रमित भएका छन् ।
यसैगरी, भक्तपुरमा ३५६, नुवाकोटमा ३३७, काभ्रेमा २१५, दोलखामा १२४, सिन्धुपाल्चोकमा ८३, रामेछापमा ३८, सिन्धुलीमा ३६ र सबैभन्दा कम रसुवामा एकजना संक्रमित भएका छन् । मन्त्रालयका सूचना अधिकारी डा. भुसालले पानी पर्ने क्रम रोकिएकाले डेंगुको संक्रमण केही कम हुने भए पनि अझै एक–दुई महिना सचेत रहनुपर्ने जनाए । उनले डेंगु संक्रमणको जोखिम अझै रहेकाले सचेत रहन र सावधानी अपनाउन आग्रह गरे।
विशेषगरी डेंगुको भाइरस फैलाउने लामखुट्टे खाल्डाखुल्डीमा जमेको सफा पानी, पुराना टायर, ड्रम, भाँडाकुँडा आदिमा जम्मा भएको पानीमा बस्ने हुँदा तिनलाई खाली गर्नुपर्ने उनको सुझाव छ ।
