काठमाडौं । नेपाल कम्युनिष्ट पार्टीका महासचिव नेत्रविक्रम चन्द ‘विप्लव’ले रातारात खडा गरिएका पार्टीले देशलाई भुलभुलैयामा पार्न खोजेको टिप्पणी गरेका छन्।
शनिबार चितवनमा आयोजित एक कार्यक्रममा बोल्दै उनले रातारात च्याउजसरी उम्रिएका पार्टी र व्यक्तिले देश र जनताको सेवा गर्न नसक्ने जिकिर गरे।
उनले भने, ‘केही मान्छेले भ्रम छोडेका छन्। संस्कृतिको नाममा, गुटको नाममा, च्याउजस्ता उम्रेका पार्टीले रातारात खडा गरेका मान्छेहरुलाई देशलाई भुलभुलैयामा पार्न खोजेका छन्। कदापि सम्भव छैन।’
उनले अब फुटेका माओवादीहरु एकताबद्ध भएर जनताको सेवा गर्न चाहेको जनाए।
उनले सबै माओवादी पार्टीबाट अलग भएकाहरु एकताबद्ध भएर अघि बढ्नसके माओवादी पार्टीले २०६४ सालको परिणाम हात पार्नसक्ने दाबी गरे।
उनले भने, ‘यो देशमा एकचोटी हामीले जनताको सेवा गर्न पाउनुपर्दछ। हामीले भनेका छौँ।
नेपाली जनताको सेवा गरेर हामी देखाउन चाहन्छौँ। यहाँ अरु कसैले पनि गर्न सक्दैन। हाम्रो दावी छ। त्यसकारण यहाँ कुरा के छ भने एकचोटी एकताबद्ध हुने हो। एकताबद्ध भएर अगाडि जाने हो।’
