हेटौँडा । हेटौँडा उपमहानगरपालिका–२ स्थित एक होटेलमा पुरुष मृत अवस्थामा फेला परेका छन् ।
हेटौँडा–२ मा रहेको पल्पसा प्याराडाईज होटेलमा शुक्रबार अपराह्न काठमाडौं चाबहिल–७ बस्ने अन्दाजी ४७ वर्षीय अजय मानन्धर मृत अवस्थामा फेला परेका हुन ।
होटेलको तेस्रो तल्लाको कोठा नम्बर ४०५ मा बसेका पुरुष मृत अवस्थामा फेला पारेको जिल्ला प्रहरी कार्यालय मकवानपुरका प्रहरी नायब उपरीक्षक श्यामु अर्यालले जानकारी दिनुभएको छ ।
असोज २७ गतेदेखि मानन्धर सोही होटेलमा बस्दै आएको र फोन गर्दा नउठेपछि प्रहरी, जनप्रतिनिधिको रोहबरमा होटेलको कोठा खोली हेर्दा मृत अवस्थामा फेला पारेको उहाँले जनाउनुभयो ।
मृत फेला परेका मानन्धरको मामाघर हेटौँडा रहेको र घटनाको अनुसन्धान भइरहेको प्रहरीले जनाएको छ । शव हेटौँडा अस्पतालमा राखिएको छ ।
